Tơnơ̆ tŭ phan mắc ca bơh Công ty Kong kơnòl nă să is Phan lơh gơs bơh suơn sre Ù pơrhê Bazan (thôn 4, sàh Nhân Cơ, càr Lâm Đồng) geh dờp OCOP 3 sơmañ nam 2024, mpồl lơh sa kă bro khin cha rề ơnàng ù tiah tam phan. Ờ mìng tơnguh khà blơi mắc ca ris làng bol dê, công ty gam bơcri priă blơi măi mok lơh phan bơh chờm, pơr mờ lơh gơlik phan nàng tơnguh priă lơh geh phan bơna dê. Nam do, khà mắc ca lơh gơs phan kờp dŭ geh mờr 100 tấn, gơguh uă dơ̆ pơndrờm mờ lài. Bulah bè hơ̆, bal mờ khà phan lơh geh gơguh mhar là bơta kơn jơ̆ jòi anih blơi phan kơ̆ kơljap jŏ jòng sùm.

Mò Thân Thị Thảo, Kwang Lam bồ Mpồl lơh sa kă bro yal, kă bro phan điện tử là gùng lòt geh uă bơta pràn mơya mpồl lơh sa kă bro kung gam kờñ geh dong kờl nàng lơh geh cồng nha: “Nam do khà mắc ca gơguh uă rlau bơh 2 tus 3 dơ̆, anih blơi tờm ngan bol hi dê kung gam tac jat broă lơh ờs mờng bơh cau kwèng, Facebook, Zalo. Kờñ tac tàm anih kă bro phan điện tử mơya ờ hềt geh mờng chài bè ơn tàm kơldung, bơsong jơnau kờñ blơi phan den tàng kờñ ngan geh dong kờl”.

Bơh mùl màl jơnau kờñ anih blơi phan lơh gơs bơh suơn sre in, bồ nam do, sàh Nhân Cơ ai ngui Anih tờm kă bro phan điện tử tàm Hìu lơh broă Đảng ủy sàh tơn, bal mờ website nhanco.vn bè dùl “Drà sồ” bơh ƀòn lơgar dê. Tàm do, ală cau tờm geh dong kờl bơt bơtàu rùp să, ai phan bơna tơmut tàm anih kă bro phan, jòi git anih lơh gơlik, yal tơnggit, tac phan mờ tàm tơrbŏ bal jun pơndiang. Kơnờm bơh hơ̆, cau lơh gơlik phan rơhời tam gơl bơh mờng kwèng kơp cau blơi phan gơ gơs rơcang lài jòi cau blơi mờ bơt bơtàu mat kă bro tàm măi mok sồ. Bi Phạm Thị Nga, cau tờm anih tac yến sào Thiên Ngọc Nga tàm thôn 10, sàh Nhân Cơ pà git, broă mut tàm anih kă bro phan điện tử sàh dê neh lơh gơlik tai tŭ niam jòi git cau blơi phan bơdìh ƀòn lơgar: “Bơh tŭ mut tàm anih kă bro phan điện tử sàh dê, phan yến sào geh uă cau git tus rlau, cau blơi bơh uă tiah jòi tus. Añ kơp kờñ tơngai tus, ờ mìng yến sào lơm gời, mờ jơh bal mắc ca, kơphe mờ uă phan ndai ƀòn lơgar dê rơp geh yal tơnggit ơnàng rlau, kờñ mut tus uă drà krơi is”.

Tŭ do, sàh Nhân Cơ geh 8 phan OCOP mờ gam lơh sir sră nggal sền swì tai 4 phan pa. Jơh gùt sàh geh 10 mpồl lơh broă bal lơh broă uă ngan tàm gah lơh sa suơn sre, mờ kờp jơh priă bơcri cih tàm sră rlau 28 tơmàn 500 tơlak đong. Do là khà phan kuơmàng ngan nàng ƀòn lơgar in pơn jat tai rề ơnàng kă bro phan điện tử. Jat ồng Vũ Trọng Tài, Phó Lam bồ Cơldŭ Lơh sa - Phan bơna sàh Nhân Cơ, tơnơ̆ mờr nggùl nam lơh broă, bơta pal chờ hờp ngan rlau jơh ờ mìng là khà phan geh tơmut tàm anih kă bro phan mờ là bơta tam gơl tàm bồ tơngoh git wă ală cau tờm lơh gơlik phan dê: “Bơh nhai 2 nam 2026 tus tŭ do, anih kă bro phan điện tử sàh dê neh lir mat 12 phan bơh 8 cau tờm lơh gơlik phan ƀòn lơgar dê. Bol hi tơng gơs jơnum lơh broă nàng dong kờl làng bol tơmut phan tàm anih kă bro, yal tơnggit, bơsong jơnau dan blơi phan mờ pơn jat tai rề ơnàng webiste nhanco.vn nàng kă bro phan điện tử gơ gơs là bơta gơn kơnờm bơtàu tơnguh broă lơh sa suơn sre ƀòn lơgar dê”.

Anih kă bro phan điện tử tàm Nhân Cơ bè hơ̆ den tàng ờ mìng là anih pơnđàng jơnau yal tơnggit phan bơna halà dờp sră dan blơi phan. Do gam là anih tàm tơrbŏ bal đah mpồl lơh sa kă bro, mpồl lơh broă bal mờ hìu bơnhă lơh gơlik phan; tiah ală cau lơh broă suơn sre tam pà bal mờng chài, jòi cau lơh bal mờ rơhời lơh gơs ală broă lơh sa tàm rề ơnàng drà kă bro.

Ồng Phan Anh Tuấn, Bí thư Đảng ủy sàh Nhân Cơ đơs là, cồng nha dờng ngan rlau jơh broă lơh tơrlòng lài dê ờ gơ ơm tàm khà sră dan blơi phan tềng đap mat mờ tàm broă lơh gơlik dùl mpồl tàm tơrbŏ bal lơh tơlik phan mờ tac phan bơh tàm kâp hơđơm tơn: “Cồng nha bơh sơn rờp ờ mìng là tac geh phan mờ gam lơh geh anih nàng mpồl lơh sa kă bro, mpồl lơh broă bal tàm tìp, tàm tơrbŏ bal, yal tơnggit mat kă bro. Bol hi kơp kờñ ngai sơlơ geh uă phan sàh Nhân Cơ dê mờ ală ƀòn lơgar rềp bal dê geh tơmut tàm anih kă bro, nàng uă cau git rlau ală phan tiơng pơn rơ ù tiah do dê, bơta pràn sàh dê kung geh tơnguh bơta kuơ”.

Bơh dùl “Drà sồ” kâp sàh dê, Nhân Cơ gam lơh geh dùl broă lơh pa tàm bơtàu tơnguh lơh sa suơn sre mờ bơt bơtàu ƀòn lơgar. Ờ mìng dong phan lơh gơs bơh suơn sre rề ơnàng anih blơi phan, broă lơh tơrlòng lài gam pơgồp bơnah tam gơl bồ tơngoh kơlôi sơnơng lơh sa, kă bro làng bol mờ mpồl lơh sa kă bro dê, mờ kung đơs nền gơnoar broă lòt bal bơh gơnoar atbvồ kâp hơ đơm dê tàm tam gơl sồ. Hơ̆ kung là cơng tàng ai broă ai Jơnau lơh nền tàm pơrjum sồ 57 bơh Bộ Chính trị dê tàm rài kis mờ ală broă lơh mùl màl, rơhời lơh gơs bơta tờm lơh sa sồ, lơh gơs mờ bơtàu tơnguh bơh ƀòn ù pơrhê bazan Nhân Cơ, càr Lâm Đồng.