Bơh bồ nam 2026 tus tŭ do, di tàm drim ngai dơ̆ 5 pah poh, Anih duh broă Làng bol sàh Hàm Tân, càr Lâm Đồng bơyai lơh tai dơ̆ “Iăt kơno mờ boh bơr bal mờ làng bol” tàm hìu duh broă sàh dê tơn. Ồng Trương Quang Lập, ơm tàm sàh Hàm Tân yal, broă lơh do geh kwơ ngan ngồn, ai tơl bơta ƀươn nàng làng bol in tơm bơh bơr tơn mờ đơng lam ƀòn lơgar.

“Ală sră pơ àr gơrềng tus ù tiah den kung ờ suk ngan sơl, mơya kơnờm bơh geh ngai dơ̆ 5 geh broă lơh wă làng bol, den lòt tus geh đơng lam tàm kâp hơđăng kung bơto pơlam bol hi ală broă lơh gơ in sir tơl, sơrbăc mhar”.

Ai ồng Lê Văn Hoà đơs niam ngan nùs nhơm drơng broă bơh kwang bàng kâp hơđơm dê:

“Đơs bal, kwang bàng tàm do sơrbăc mhar ngan mờ broă lơh, mơya tài bơh pa tam gơl pa den tàng kung gam lơyai sơl dồ êt. Đơs ngan cau lơi kung jơh nùs jơh tồr lơm. Añ lòt ndo lơh sră pơ àr sră ù, hơ̆ sồng lơh ală broă gơrềng tus pin dờn jăt yàng, đơs bal là nùs nhơm dồ nùs bal uă ngan, añ gŏ là niam ngan”.

Bơh tŭ lam lơh broă lơh tus tŭ do, gơnoar ătbồ sàh Hàm Tân neh iăt kơno rlau 320 dơ̆ jơnau đơs tă pơgồp bơ̆t bơtàu gơnoar ătbồ mờ tă bơsong tơn uă bơta gơkòl bơh làng bol dê tàm ală tŭ lơh sră nggal sră pơ àr gơnoar ătbồ.

Ờ mìng tàm Hàm Tân lơm, drim ngai Dơ̆ prao poh sơnrờp bơh nhai 7 pa do dê, sơnah ƀòn Phú Thủy kung dơ̆ sơnrờp tơlik măt broă lơh “Kơphê drim bơh đơng lam sơnah ƀòn dê mờ làng bol”. Broă lơh tơnơ̆ hơ̆ tơn gơhòi gơ jà bơta sền gròi gal ngan bơh mpồl bơtiàn dê.

Gơnoar ătbồ sơnah ƀòn Phú Thủy pà gĭt, broă geh broă rơndăp lơh bơyai lơh “Kơphê drim” ờs mờng pah dơ̆ pah nhai dồ dơ̆, tàm pơdar bơyai lơh tàm 12 jơnum làng bol tiah drà tàm ù tiah he dê. Mò Nguyễn Thị Minh Ngọc, Chủ tịch Anih duh broă Mặt trận dà lơgar Việt Nam sơnah ƀòn Phú Thủy đơs sùm, jơnau kờñ bơh broă lơh dê là lơh jăt niam ngan jơnau đơs “rềp làng bol, wă wờng làng bol”.

"Gơ wèt mờ ală tơngume gơtùi tơm bơh bơr mờ bơsong tơn den đơng lam kung neh sồr ală cơldŭ mpồl lơh broă ờs mờng cribơyai tơn tàm dơ̆ hùc dà kơphê. Ai gơ wèt mờ ală broă kờñ pal kơlôi sơnơng sră nggal nàng bơsong den Mpồl Duh broă sùm mặt trận tơrgùm jơh wơl mờ jun ală tơngume gơrềng tus gơnăp gơnoar bơsong bơh ală cơldŭ mpồl lơh broă ờs mờng dê nàng tơrgùm wơl mờ sồr bơsong di tŭ làng bol in”.

Nùs nhơm ai bơta niam nùs làng bol mờ mpồl lơh sa kă bro lơh gai was gam lơh gơrề pràn kơldăng. Ală dơ̆ “kơphê drim” halà ală ngai “iăt làng bol đơs” gam pơgồp bơnah bơ̆t bơtàu bơta pin dờn, bơ̆t bơtàu dồ rài lơh broă sră pơ àr gơnoar ătbồ ai bơta niam nùs bơh làng bol dê lơh gai was.