Dơ̆ pơrlòng Coh kơphe lơgar Việt Nam rơ̆p bơyai lơh tàm ngai 10 nhai 3 nam 2025, yal cồng nha mờ jào khà jờng rơ tàm ngai 13 nhai 3 nam 2025, di tàm dơ̆ geh bơyai lơh Lơh chờ kơphe Buôn Ma Thuột dơ̆ 9. Cau tus bal dơ̆ pơrlòng là làng bol lơgar Việt Nam bơh 18 sơnam rơlao hờ đang, gam kis mờ lơh broă tàm ù tiah lơgar Việt Nam. Ală cau pơrlòng neh sơrlèt mờ ală tơngu me bơh dơ̆ pơrlòng dê, tàm hơ̆ geh: tìp mờ gar kơphe ngui nàng coh, lơh mờng mờ măi coh; jào broă rơndăp lơh coh mờ khà măt broă mblàng bơta bơkah phan geh lơh, mờ coh… Ồng Trịnh Đức Minh, Củ tịc Tơrgùm ală mpồl kơphe Buôn Ma Thuột pà git, càr Dăk Lăk gam lơh ngan bơtàu tơnguh Buôn Ma Thuột gơs ƀòn dờng kơphe dunia dê, bơdìh hơ̆ tai broă ai tơngŏ bè bă ù tam, khà phan geh lơh den bơta bơkah gar kơphe dê tơnơ̆ mờ tŭ neh lơh is kung pal geh sền gròi.

Bơh cồng nha lơh geh bơh dơ̆ pơrlòng dơ̆ sơnrờp, tàm dơ̆ pơrlòng nam do, Tơrgùm ală mpồl pơn jăt tai geh uă tam gơl pa nàng ală cau chài coh geh dơ̆ niam nàng tơlik bơta chài bơh să tờm dê. Mờ lơh geh ală phan kơphe coh bŏ geh bơta bơkah ngan, pơnyờ tơnguh ală bơta kwơ pa bơh gar kơphe dê tàm broă coh. Ồng Trịnh Đức Minh pà git: “Dơ̆ pơrlòng nam do bè broă lơh, bè đah bơyai lơh dờng rơlao, uă rơlao, geh tus uă mpồl bơtiàn rơlao. Dơ̆ bàr, ai khà li dà kơphe geh ai khà jăt mờ jơnau pa geh ai bơh tàm khà bơh SCA (Tơrgùm ală mpồl kơphe bơkah Ală lơgar dê) mờ CQI (Anih bơkah kơphe - tàm lơgar Mỹ). Dơ̆ pe tai là jà ală cau jăk bơh lơgar bơdìh tus sền bè bơta bơkah kơphe dê, geh nùs nhơm nền nòn pơnrơ ngan bè kơphe nàng hòi jà ală cau gơboh kờñ kơphe tus mờ tiah tờm lơh kơphe dê”.

Lơagr Việt Nam neh gơguh lam lài bè kơphe Robusta bơkah bơh dunia dê den kung pal geh ală cau chài coh kơphe jăk ngan dunia dê sơl. Do là jơnau kơ̆p kờñ bơh kwang đơng lam bồ Tơrgùm ală mpồl kơphe Buôn Ma Thuột dê, do là mpồl đơng lam dơ̆ pơrlòng Coh kơphe lơgar Việt Nam nam 2025. Tơnơ̆ mờ 2 nhai lam lơh, dơ̆ pơrlòng neh dờp geh jơnau yal bơh 36 nă cau pơrlòng tus bơh 13 càr, ƀòn dờng dan cih măt tus bal pơrlòng, tàm hơ̆ càr Dăk Lăk mờ ƀòn dờng Hồ Chí Minh geh cau tus pơrlòng gal ngan tàm dơ̆ pơrlòng.

Bơta krơi is bơh dơ̆ pơrlòng do pơn drờm mờ ală dơ̆ pơrlòng ală lơgar dê là ngui kơphe Arabia mờ Robusta lơgar Việt Nam dê. Cau pơrlòng pal coh gơs phan Pour Over (dùl gùng dà broă lơh klài mờ tê nàng lơh geh bơta niam bơh dà kơphe dê) mờ klài phin. Bal mờ hơ̆, pal lơh di 3 bơta git: sền bơta niam kơphe gar, coh mờ klài dà kơphe. Tàm hơ̆ pal kah ngan gơnah ai khà li dà kơphe rơ̆p geh ai jăt jơnau pa ai bơh tàm khà bơh SCA (Tơrgùm ală mpồl Kơphe bơkah ală lơgar dê) mờ khà CQI (Anih kơlôi sơnơng Bơta niam Kơphe - tàm lơgar Mỹ). Jăt ồng Lê Đức Huy, Phó Củ tịc Tơrgùm ală mpồl kơphe Buôn Ma Thuột yal, dơ̆ pơrlòng Coh kơphe Việt Nam ờ mìng là anih tơrgùm ală cau kờñ gơboh, jơh nùs mờ broă lơh kơphe nàng tam pà jơnau git wă, broă lơh mờng chài, ai geh bơta niam nàng tơrbŏ bal lơh geh broă hòi jà, lơh geh broă gơhòi nùs nhơm, chờ bè kơphe mờ gam là broă lơh kờñ tơnguh uă bơta kwơ bơh kơphe lơgar Việt Nam dê.

Ồng Lê Đức Huy pà git: “Nàng bơtàu tơnguh kơ̆ kơl jăp drà kă bro ờ mìng he bơtàu tơnguh broă lơh geh mờ gam pal bơtàu tơnguh broă tăc. Lơgar Việt Nam neh ai tơngŏ là lơgar lơh kơphe Robusta uă ngan bơh dunia dê mờ neh lam lài bè kơphe Robustan bơkah bơh dunia dê, den he pal geh ală cau chài coh gar kơphe jăk ngan dunia dê”.

Gơtùi đơs, dơ̆ pơrlòng Coh gar kơphe Việt Nam nam 2025 là dùl broă lơh mùl màl mờ geh kwơ, lơh pràn broă bơtàu tơnguh bơh gah lơh kơphe dê jăt gùng dà broă lơh jăk chài mờ kơ̆ kơl jăp. Do ờ mìng là dơ̆ niam nàng jờng rơ ală cau chài coh gar kơphe mờ gam là dùl broă lơh kwơ màng tàm broă lơh kờñ tơnguh bơta bơkah bơh gar kơphe lơgar Việt Nam dê.

Bơdìh dơ̆ pơrlòng Coh kơphe, tàm broă lơh Chờ kơphe Buôn Ma Thuột dơ̆ 9 nam 2025, Mpồl tam klăc kơphe Buôn Ma Thuột gam bơyai lơh tai ală broă lơh nàng hòi jà cau năc tus bal bè: Dơ̆ pơrlòng The Art Amazing Cup 2025 ai ală cau kờñ gơboh mờ môn klài dà kơphe chài in tàm ngai 11 nhai 3 mờ Talkshow mờ tơngu me “Buôn Ma Thuột tiah tus bơh kơphe Dunia dê” mờ uă cau chài mblàng yal pin dờn tus bal.