Ia Pết là sàh uă kal ke tàm càr Gia Lai. Sàh geh rlau 1 rbô 800 hìu bơnhă làng bol mờ mờr 9 rbô 200 nă cau, tàm hơ̆ uă ngan là kòn cau Jrai mờ Bahnar. Nàng dong kờl broă lơh sa ai làng bol in, sàh Ia Pết pà tơl hìu bơnhă rƀah, hìu bơnhă pa jơh rƀah in 1 nơm kơn rồ me deh kòn. Kơn rồ blơi tàm sàh tơn mờ mờng là kơn rồ bơ tờp sơntìl pa.

Tŭ lam lơh rơndap broă lơh, sàh lam lơh pơrjum thôn, rơ wah loh làng ală hìu bơnhă làng bol geh tơl bơta nàng geh dờp kơn rồ. Tơnơ̆ tŭ geh mat ală hìu bơnhă geh dờp dong kờl bơh rơndap broă lơh, sàh ơpah rơndeh pơndiang làng bol tus tàm anih tac kơn rồ sơntìl nàng làng bol in rơ wah kơn rồ jat bơta kờñ he dê. Ồng Lữ Quốc Tuấn, Củ tịc Anih duh broă làng bol sàh Ia Pết yal loh làng rlau: “Khà priă dà lơgar dong kờl blơi dùl nơm kơn rồ geh giă bơh 14 tus 15 tơlak đong. Bơdìh mờ priă dà lơgar dong kờl, làng bol gam tă is tai, gơtùi tă is tai priă nàng blơi ală kơn rồ dờng rlau. Khà kơn jơ̆ kơn rồ gơ jat tàm tơngume rơndap broă lơh, pơn yơu kơn rồ kơn jơ̆ bơh 120 kĭ, mơya uă ngan làng bol rơ wah kơn rồ kơn jơ̆ rlau 160 kĭ dùl nơm. Khi tă is priă bơh 1 tus 3 tơlak đông dùl nơm. Tus tŭ do, geh 109 hìu bơnhă làng bol geh dong kờl kơn rồ sơntìl bơh rơndap broă lơh”.

Tơnơ̆ 3 nam lam lơh rơndap broă lơh, uă hìu bơnhă rƀah geh dờp dong kờl bơh broă lơh do, broă kơn rồ ngai sơlơ bơtàu tơnguh. Bi Rmah Thim, kòn cau Jrai ơm tàm thôn Alphun, sàh Ia Pết pà git: “Nàng tơn jơh jơgloh tơrmù rƀah, dà lơgar dong kờl làng bol ròng kơn rồ. Tàm thôn geh uă cau ròng kơn rồ me deh kòn. Hìu añ ròng 1 nơm kơn rồ me. Dùl nam gơ deh 1 nơm”.

Bal mờ broă pà kơn rồ làng bol in, gơnoar atbồ sàh gam pơlam bơta chài ròng mờ rơcang lài pleh kòp bơ tờp tàm mpồl phan ròng ai ală hìu bơnhă làng bol tus bal rơndap broă lơh in. Bi Lê Minh Thu, kwang bàng lơh broă ù tiah broă lơh sa suơn sre sàh Ia Pết pà git: “Tàm tŭ lam lơh rơndap broă lơh, sàh jà làng bol tus cribơyai, ring bal broă rơndap lơh nàng làng bol in sac rơ wah is. Tơnơ̆ tŭ geh ring bal rơndap broă lơh, sàh pơlam làng bol lơh wàng ròng kơn rồ, pơlam bơta chài ròng, pơgồp bal mờ anih tờm pờ ơdŭ bơto pơlam ai làng bol in git bơta chài ròng kơn rồ. Bơh tŭ lam lơh rơndap broă lơh, tus tŭ do neh geh bàr, pe hìu bơnhă làng bol jơh rƀah”.

Mờ bơta dong kờl jơh nùs bơh gơnoar atbồ sàh dê, làng bol git bơta chài kung bè broă ròng kơn rồ. Bè hơ̆ den tàng, uă ngan khà kơn rồ dờng niam mờ deh kòn bè. Bi Nek, ơm tàm sàh Ia Pết chờ hờp yal: “Hìu añ ròng 1 nơm kơn rồ mờ kơn rồ neh deh 1 nơm. Rài kis hìu bơnhă dê neh lik bơh hìu bơnhă rƀah, añ chờ hờp ngan. Añ rơp lơh ngan pơnđơl pràn lơh sa, tryăng tryồng lơh broă nàng brồ guh, tơnguh niam rài kis, tơnguh priă lơh geh”.

Dùl nă cau ơm tàm thôn Alphun, sàh Ia Pết pà git tai: “Hìu añ dê ờ geh mìr, ờ geh ù, tŭ do geh dà lơgar dong kờl lơh hìu ơm, pà kơn rồ nàng ròng. Añ ưn ngài ngan Đảng, dà lơgar”.

Rơndap broă lơh ròng kơn rồ me deh kòn tàm sàh Ia Pết neh pơgồp bơnah dong uă hìu bơnhă brồ guh jơh rƀah. Tŭ do, sàh gam pơn jat tai lam lơh rơndap broă lơh nàng geh tai uă hìu bơnhă làng bol geh dong kờl, bơtàu tơnguh lơh sa hìu bơnhă, bơt bơtàu rài kis ngai sơlơ hờm ram.