Dùl kàl prang Sơnam pa- Nam Ất Tỵ neh tus, cèng jăt bal bơta chờ hờp, bơta gơn kơnờm mờ ală kơ̆p kờñ niam bơnĕ! Tàm tŭ jiơ dờng màng king crŭ tam jàu sơnam pa, ala măt kwang đơng lam bồ Đảng, Dà lơgar, Añ kờñ gơboh ngan gĭt lơh dan pơyua tus jơh ală làng bol, oh mi, cau ling gùt lơgar mờ làng bol he tàm lơgar ndai jơnau nting bơr chờ hờp wă rò nam pa niam bơnĕ ngan rlau jơh. Añ kung jơh nùs ngan pơyua tus gơ̆p bơyô, làng bol ală lơgar tàm dunia jơnau nting bơr chờ gờm wă rò nam pa ring lơngai, chờ hờp, lơh bơyô bal mờ bơtàu tơngguh.

Nam pa do òr, bol he neh sơrlèt uă “Nsừc dà lềng dờng, càl pràn”, mơya kung là dồ nam lơh geh uă cồng nha pal pơñiờ să ngan. Tàm kal ke, bơta lòng, nùs nhơm tam klăc, nùs nhơm kờñ gơboh kòn bơnus, kơnòl mờ làng bol mờ bồ tơngoh kơ̆p kờñ ngan brồ guh bơh jơi bơtiàn he dê sơlơ geh đơs nền pràn kơldang. Jơh gùt Đảng, gùt làng bol, gùt ling klàng he neh lơh ngan pơnđơl geh mờ sơrlèt jơh 15 broă jàu bơtàu tơngguh lơh sa- mpồl bơtiàn, bơta pràn gơguh lơh sa gơ wèt mpồl lam bồ tàm dunia; rài kis phan bơna mờ nùs nhơm bơh Làng bol dê sùm geh tam gơl niam mờ bơtàu tơngguh; cíñ trị- mpồl bơtiàn kơ̆ kơl jăp, sền gàr dà lơgar mờ lơngăp lơngai geh tơngguh tai, lơh broă mờ lơgar ndai pờ ơnàng, geh gơ̆p bơyô ală lơgar ki ngàm mờ đơs niam ngan. Tơl nă làng bol Việt Nam, tàm lơgar halà lơgar ndai, bơh cau lơh phan, cau lơh broă sa, cau kă bro, cau geh bồ tơnggoh gĭt wă tus ală cau ling tiah nhàr lơgar, bồt bơlào dà lềng ngài ngan ndrờm geh lơm gơnoar pơñiờ să bè ală tă pơgồp tàm broă lơh geh bal bơh Dà lơgar he dê.

Nam 2025, là nam bềng lơm ală broă lơh kwơmàng ngan dà lơgar dê, nam “tơngguh mhar, tam gơl pràn”, lơh gơlik geh bơnàng jă ai dà lơgar mŭt tàm rài pa- rài brồ să bơtàu tơngguh pas pràn mờ sơlơ bơtàu tơngguh; jơnau kờñ Đảng dê di mờ nùs nhơm Làng bol dê bè jơnau kờñ bơtàu tơngguh pas sơm Jơi bơtiàn dê. Bulah gam uă kal ke, bơta lòng, mơya, Việt Nam rơ̆p sùm guh hờ đah đăp, ờ geh bơta lơi rơgơi kơryan bơta kơ̆p kờñ sùm brồ să mờ rài tơnơ̆ àng sơrdah bơh Jơi bơtiàn he dê. Jơh gùt Đảng, gùt làng bol, gùt ling klàng pơn jăt tai tam klăc bal dồ nùs, dồ tồr, tơrgùm bal pràn, yờ tơngguh nùs nhơm lơh tờm is, pin dờn, kơnờm tàm bơta pràn is, kơnờm is tàm să he, pơñiờ să jơi bơtiàn, ngui jơh ală tŭ niam, sơrlèt jơh ală kal ke, bơta lòng nàng bơtàu tơngguh tam gơl pràn, bơ̆t bơtàu lơgar Việt Nam làng bol pas, lơgar pràn, làng bol lơh tờm, ndrờm bal, gơguh jak; tơl nă làng bol ndrờm geh rài kis hờm ram, khăt gơboh is, chờ hờp; tă pơgồp ngai sơlơ uă ai ring lơngai, kơ̆ kơl jăp, bơtàu tơngguh bơh kơnhoàl ù tiah do mờ dunia dê.

Tàm nùs nhơm ù- trồ tàm tìp bal, nùs nhơm kòn bơnus ngoh rơngăc, chờ chờr wă rò sơnam pa, dồ dơ̆ tai Añ nting bơr kơ̆p kờñ jơh gùt làng bol, oh mi, cau ling tàm jơh gùt lơgar mờ làng bol he ơm tàm lơgar ndai dồ nam pa pràn kơldang, pas sơm mờ bơtàu tơngguh. Nam pa ngan rơ̆p lơh geh cồng nha pa.

Dan ơm ngăc!