Mho ngai 28/4, tàm càr Hà Tĩnh, Củ tịc lơgar ồng Lương Cường neh wă Tổng Ƀí thư, Củ tịc lơgar Lào ồng Thongloun Sisoulith di dơ̆ ồng tus Việt Nam nàng tus bal dơ̆ ai ngui anih ơhò ơm sồ 3 – anih ơhò ơm tàm dà lềng Vũng Áng – dùl tàm ală broă lơh kuơmàng tơrbŏ bal lơh sa đah 2 lơgar mờ tus bal dơ̆ tơngkah 50 nam Ngai tơngklàs tiah đah jum, tơrgùm dùl dà lơgar.

Tàm dơ̆ wă, Củ tịc lơgar nting bơr gờm chờ mờ jờng rơ ală cồng nha mờ lơgar Lào neh lơh geh tàm tơngai lài mờ pin dờn, tềng đap bơta đơng lam bồ, sồr lơh bơh Đảng Làng bol kac màng Lào dê, tàm hơ̆ lam bồ là ồng Thongloun Sisoulith, dà lơgar Lào rơp pơn jat tai lơh geh uă cồng nha pa, dờng rlau tai, lam lơh geh cồng nha jơnau lơh nền tàm pơrjum dờng dơ̆ XI, bơyai lơh geh cồng nha Pơrjum dờng Đảng Làng bol kac màng Lào dơ̆ XII. Bè broă ai ngui anih ơhò ơm sồ 3, anih ơhò ơm tàm dà lềng Vũng Áng, Củ tịc lơgar ồng Lương Cường pin dờn, anih ơhò ơm sồ 3 – anih ơhò ơm tàm dà lềng Vũng Áng rơp drơng jơnau kờñ pơndiang phan bơna ngai sơlơ uă bơh 2 lơgar dê, drơng niam broă pơndiang phan bơna lòt gan mờ kă bro bal mờ lơgar Lào, bơh hơ̆ tă pơgồp tàm bơta bơtàu tơnguh mờ mut gơ rờm bal lơh sa bơh tơl lơgar dê.