Tàm Gơlăng Kính Thiên, tềng hơđăng bồ bơnơm Nghĩa Lĩnh ndu gơnrơh, mờ nùs nhơm jơh nùs ki ngàm duh rơngòt kah rơngal dà kơlhề Mò pàng jơi bơtiàn dê, tơnggŏ nùs nhơm “Hùc dà kah tô dà” bơh jơi bơtiàn Việt Nam dê, Củ tịc lơgar ồng Lương Cường bal mờ ală oh mi đơng lam Đảng, Dà lơgar, Cíñ phủ mờ đơng lam ƀòn lơgar mŭt tàm Gơlăng jơnhoa chu ñàng, pơdơng bơkàu, tơlik nùs nhơm gĭt ưn ngàn jrô ơnàng ngan ală cau rài lài do neh geh dà kơlhề bơ̆t bơtàu dà lơgar nàng oh kòn kòn sau in tàm pơn jăt tài pơdờn bơhiàn ờs mờng bơh yau Lạc Hồng dê bơ̆t bơtaù dà lơgar Việt Nam pas niam, jak chài bè ngai do.

Sùm tàm jơh gùt tŭ tơngai jòng ngan jơnau kah yau bơ̆t mòn dà lơgar mờ sền gàr dà lơgar, adăt bơhiàn kah rơngal dà kơlhề mò pàng yau neh gơgơs dang che tàm bơrkuăt đềt mềr, anih kơldìng nùs nhơm, anih tờm bơta pràn is ồn bơh jơi bơtiàn dê, lơh gơs cồng nha crih crài sơnđan măt Việt Nam tàm tam klăc drơng trồ tiah lơh aniai, rềs àr hoàc hươr tài trồ tiah, cau sò tơm lơh aniai, sền gàr mờ bơ̆t bơtàu ù tiah dà ia dờng pràn. Duh kah Bơtau Hùng ờ mìng là ngai chờ dờng jơi bơtiàn dê lơm mờ gam là tŭ nàng lơh gơrề nùs nhơm gơboh lơgar, kơ̆p kờñ ngan pơnđơl pràn is, kơnờm tàm bơta pràn is mờ kơ̆p gơn sùm brồ guh- di ngan bè jơnau Wa Hồ neh nting tơngkah: “Ală Bơtau Hùng neh geh dà kơlhề bơ̆t mòn dà lơgar, Wa mờ sau he pal bal mờ gơ̆p sền gàr tĕ dà lơgar”.