Drim ngai 28/03, tàm Hìu lơh broă Củ tịc, Củ tịc lơgar ồng Lương Cường neh đơng lam dơ̆ wă Kwang atbồ lơgar Brazil ồng Luiz Inácio Lula da Silva còp kấp Dà lơgar tus lơgar Việt Nam. Tơnơ̆ tŭ bơyai lơh Dơ̆ wă rò ngan ngồn yŭ rơyùm, Củ tịc lơgar ồng Lương Cường neh pơrjum bơyai kấp dờng mờ Kwang atbồ lơgar Brazil.

Tàm dơ̆ pơrjum bơyai kấp dờng, Củ tịc lơgar ồng Lương Cường đơs sùm dơ̆ lòt còp dơ̆ do nàng kờñ đơs nền Brazil sền dờng màng mờ kơ̆p kờñ sơlơ tơnguh tai bơta Tam klăc lơh broă bal jŏ jòng mờ Việt Nam tàm tơrgùm bal broă lơh bơtàu tơnguh bơta gĭt gơ̆p mờ Asean mờ câu Á- Thái Bình Dương. Bàr nă kwang đơng lam bồ cribơyai, ring bal ală gùng dà broă lơh, broă bơsong nàng kờñ pơn jat tai bơtàu tơnguh bơta gĭt gơ̆p Tam klăc lơh broă bal jŏ jòng Việt Nam mờ Brazil ngai sơlơ mut lơh broă jrô ơnàng làm uă, ngan ngồn mờ geh cồng nha, kung bè cribơyai bè ală broă tàm tiah do mờ tàm ală lơgar sền gròi bal. Đơs bè bơta sền sơnơng bơtàu tơnguh Dà lơgar, kờñ ală bơta kwơ uă lơgar, lơh broă bal bơtàu tơnguh bal, mờ tơnguh uă gơnoar bơh ală lơgar gam bơtàu tơnguh dê tàm ală gùng dà broă lơh atbồ gùt plai ù, 2 nă kwang đơng lam bồ ring bal sơlơ tơnguh tai pơgồp bal, lơh broă bal mờ kờñ bal mờ gơ̆p tàm ală mpồl Ală lơgar, dơ̆ cribơyai uă lơgar mờ ală tiah dê.