Củ tịc lơgar ồng Lương Cường jờng rơ uă ngan ală tiah, bulah gam uă kal ke, mơya kấp ủy, gơnoar atbồ, ling klàng mờ làng bol càr Lai Châu neh tam klăc bal, lơh ngan, pơn đơl pràn sơr lèt gan tơl bơta kal ke, bơta lòng, sền bal là lơh sir niam ală jơnau kờñ, broă jàu bơtàu tơnguh lơh sa, niam chài, mpồl bơtiàn. Rài kis bơh làng bol tàm ù tiah do dê geh tam gơl loh làng; sền gàr Dà lơgar, lơngăp lơngai, lơh broă mờ lơgar ndai geh bơt bơtàu mờ sơlơ tơnguh tai uă.

Củ tịc lơgar sồr kấp ủy, gơnoar atbồ, ală kấp, ală gah broă, ală mpồl cau bơh càr Lai Châu dê pal tơrgùm đơng lam, sồr lơh, sồr lơh jat jrô ơnàng làm uă gùng dà broă lơh bơh Đảng, adat boh lam bơh Dà lơgar dê; pơn jat tai sền gàr, ngui niam bơhiàn kờñ gơboh Dà lơgar, kơ̆ dơn, khin cha, lơh broă tơryang tơryồng, nùs nhơm tàm dong tàm kờl bal, kờñ gơboh ling klàng mờ làng bol càr Lai Châu; lơh jat niam bơta pràn mpồl tam klăc dờng jơh gùt jơi bơtiàn, lơh kah wơl bơta kơ̆p kờñ bơt bơtàu ƀòn lơgar pas niam, lơh jat geh cồng nha ală srơh kăc màng, bơtàu tơnguh rài kis phan bơna, nùs nhơm bơh làng bol dê mờ nùs nhơm “Jơh gùt lơgar tàm sơm bat tê bal tài cau rƀah, ờ gŏ di lời dô nă lơi gơtìp lời wơl bơh ngkời” mờ srơh pơrlòng “Tơn jơh hìu lơh ing, hìu sèt ñhăt dà mìu” jat di nùs nhơm sồr lơh bơh Cíñ phủ mờ Thủ tướng Cíñ phủ dê.