Ala măt kwang đơng lam Đảng bal mờ Dà lơgar, Củ tịc lơgar ồng Lương Cường neh jào gai lòng 65 sơnam Đảng mờ chờ gờm Củ tịc lơgar lài do ồng Trần Đức Lương; mờ đơs nền, do là phan pà kwơ màng bơh Đảng, dờp broă lơh bal mờ ală broă pơgồp bal dờng màng bơh ồng Trần Đức Lương dê gơwèt mờ broă kăc màng bơh Đảng bal mờ jơi bơtiàn he.

65 nam ơm bal tàm mpồl Đảng, bŭ lah tàm ală gơnoar broă lơh lơi, ồng Trần Đức Lương kung sùm tơnguh uă nùs nhơm lam lài bơh cau đảng viên dê, dờm song mờ Đảng mờ Dà lơgar, jơh nùs drơng broă kăc màng bơh Đảng, bơh jơi bơtiàn, lơh gơs ală kơnòl broă kwơ màng geh jào, di pal ngan mờ nùs nhơm pin dờn Đảng, Dà lơgar bal mờ làng bol dê. Củ tịc lơgar kơ̆p kờñ ồng Trần Đức Lương bal mờ hìu nhă sùm pràn kơl dang, gơboh gơbài, kis jŏ, geh uă bơta chờ tàm rài kis; kơ̆p kờñ ồng pơn jăt tai pơgồp uă rơlao tai ai broă kăc màng Đảng, Dà lơgar bal mờ làng bol in.