Dờp jơnau jà bơh Củ tịc lơgar ồng Lương Cường mờ Pơ ùr ồng dê, Bơtau lơgar bơtau Bỉ ồng Philippe mờ Pơ ùr còp kâp Dà lơgar Việt Nam bơh ngai 31/03 tus ngai 04/04/2025. Drim ngai 01/04, tơnơ̆ Dơ̆ wă rò kâp Dà lơgar geh bơyai lơh dờng màng ngan tàm Hìu Củ tịc, Củ tịc lơgar ồng Lương Cường mờ Bơtau lơgar bơtau Bỉ ồng Philippe neh geh dơ̆ tìp măt kâp dờng.

Tàm dơ̆ tìp măt kâp dờng, Củ tịc lơgar ồng Lương Cường đơs nền, Việt Nam sùm sền dờng màng mờ kơ̆p kờñ tơngguh tai lơh broă bal uă bơta mờ lơgar Bỉ, lơgar tàm mpồl geh gơnoar broă mờ jơnau đơs kwơmàng tàm EU dê; tơlik nùs nhơm sền dờng màng bơta dong kờl kwơmàng ngan bơh làng bol lơgar Bỉ dê lời ai lơgar Việt Nam in tàm broă lơh tam lơh jòi geh bơta lơngăp lơngai is jơi bơtiàn in lài do kung bè ală nùs nhơm niam bơnĕ mờ tă pơgồp să tờm is Bơtau mờ Pơ ùr Bơtau lơgar Bỉ dê lời ai dà lơgar, làng bol Việt Nam mờ gĭt gơ̆p 2 lơgar tàm tơngai do. Bàr nă Kwang đơng lam bồ neh cribơyai bè ală broă lơh lơh broă bal dờng đah 2 lơgar nàng kờñ ai gĭt gơ̆p lơh bơyô bal, ờs mờng bơh yau đah Việt Nam mờ Bỉ gơlòt mŭt ngan ngồn tàm uă broă, geh kwơ, geh cồng nha, geh sơlơ tìp măt mờ tàm pơgơl ală mpồl kwang bàng lòt còp bal mờ gơ̆p, ngan là kâp dờng, tàm jơh ală gah Đảng, Dà lơgar, Cíñ phủ, Quôk hội; pơn jăt tai lam lơh geh cồng nha ală mpồl lơh broă bal 2 gah gam geh tŭ do mờ kơlôi sơnơng geh ală mpồl lơh broă bal pa nàng kờñ lơh jrô ơnàng lơh broă bal mìng dùl gah đah 2 lơgar.