Đơs tàm dơ̆ tìp mat mờ cau tĕ khà, Củ tịc lơgar ồng Lương Cường jờng rơ uă ngan ală jơnau đơs tă pơgồp jrô ơnàng làm uă, cèng bơta bơt bơtàu, tơngŏ kơnòl, nùs nhơm jơh nùs gơwèt mờ bơta bơtàu tơnguh pas gơs mờ jŏ jòng sùm bơh Dà lơgar dê. Ală jơnau đơs tă pơgồp tơngŏ bơta brơn brài tềng đăp ală gùng dà broă lơh pa cèng bơta kwơ màng bơh Dà lơgar dê; bơta mut lơh bal pràn kơl dang, dùl ròt bal bơh jơh ală anih lơh broă cíñ trị, ală mpồl lơh sa kă bro mờ ală rơnàng làng bol, pơgồp bơnah lơh geh ală cồng nha kwơ màng tàm jơh ală gah broă lơh sa, mpồl bơtiàn, sền gàr Dà lơgar, lơngăp lơngai tàm ù tiah do dê.

Mờ ală cau tĕ khà kung đơs uă jơnau gam kal ke bơh bơta geh ngan gơrềng tus rài kis làng bol dê kờñ geh tă bơsong mờ bơsong. Drim dùl ngai bal, tàm Tiah tềl lời wơl kah yau Dà lơgar Ngã Ba Giồng (sàh Xuân Thới Thượng, kơnhoàl Hóc Môn), Củ tịc lơgar ồng Lương Cường neh tus pơdơng bơkào, chu ñàng mờ lời dồ ết phuk kun bồ kah kơlôi tơngŏ nùs nhơm gĭt ưn ngài uă ngan, kah kơlôi dà kơl hề dờng màng bơh Củ tịc Hồ Chí Minh dê mờ kah ưn ngài ală oh mi lài do là đơng lam bồ Đảng Dà lơgar, ală cau lơh broă kăc màng jŏ nam, ală cau ling khin cha jak chài, làng bol chơ̆t phi să tài bơh lơngăp lơngai is, khat gơboh bơh jơi bơtiàn, tài bơta chờ hờp bơh Làng bol dê.