Ngai òr (07/05), tàm ƀòn dờng Hải Phòng, Mpồl ling Dà lềng bơyai lơh Tơnkah 70 nam Ngai crơng gơs Ling dà lềng làng bol Việt Nam (7/5/1955 - 7/5/2025) mờ dờp Gai lòng Hồ Chí Minh. Củ tịc lơgar ồng Lương Cường, Củ tịc Mpồl duh broă Sền gàr dà lơgar-Lơngăp lơngai, Kwang atbồ Mpồl ling phào crong làng bol tus mờ jào Gai lòng Hồ Chí Minh pà Ling dà lềng in.

Jào Gai lòng Hồ Chí Minh, phan pà kwơ màng bơh Đảng, Dà lơgar ai Ling dà lềng in mờ geh jơnau đơs tàm pơrjum, ala măt Kwang đơng lam Đảng, Dà lơgar, Củ tịc lơgar ồng Lương Cường neh chờ gờm, jờng rơ ală cồng nha bal mờ broă pơgồp bal dờng màng bơh Ling dà lềng làng bol Việt Nam tàm broă kăc màng jăk chài bơh Đảng, bơh jơi bơtiàn dê tàm 70 nam do. Củ tịc lơgar đơs loh, ală nam tus, bơta tàm dunia, tàm tiah do ring lơngai, lơh broă bal kung gam là gùng dà broă lơh tờm; mơya, pơn jăt tai gơtìp bơta kal ke, ờ git lài, tàm pơrlòng jŏ jòng đah ală lơgar dờng, ală anih tờm gơnoar dờng gơtìp cui rơcai, pràn kơl dang. Củ tịc lơgar đơs nền, dà lềng, bồt dà lềng geh bơngă kwơ màng ngan tàm broă bơtàu tơnguh lơh sa mpồl bơtiàn, tơrgùm bal mờ ală lơgar, là tiah niam jŏ jòng kwơ màng bè sền gàr dà lơgar, lơngăp lơngai. Sền gàr tơl niam ù tiah dà lềng, bồt dà lềng Dà lơgar là nùs nhơm, jơnau kơ̆p kờñ, là kơnòl bơh gùt Đảng, gùt làng bol, gùt ling klàng he, tàm hơ̆ Ling dà lềng làng bol Việt Nam là mpồl tờm ngan.