Ƀộ trưởng Ƀộ Cribơyai broă mờ lơgar ndai lơgar Lào tơlik nùs nhơm ưn ngài Đảng, Dà lơgar mờ làng bol Việt Nam sùm dồ nùs bal, tam klăc đềt mềr bal mờ Đảng, Dà lơgar mờ làng bol ală jơi bơtiàn Lào. Củ tịc lơgar ồng Lương Cường pin dờn là mờ mờng chài rơ̆ ru mờ bềng lìu tàm broă lơh, bal mờ nùs nhơm niam bơnĕ bơh Ƀộ trưởng dê gơ wèt mờ Việt Nam, tàm gơnoar broă he dê, Ƀộ trưởng Ƀộ Cribơyai broă mờ lơgar ndai lơgar Lào dê rơ̆p geh uă tă pơgồp jơh nùs ai gĭt gơ̆p đah 2 lơgar in.

Củ tịc lơgar đơs niam ngan cồng nha lơh broă đah bàr Ƀộ Cribơyai broă mờ lơgar ndai tơngai lài, pơgồp bơnah geh kwơ ngan ngồn tàm broă tơngguh tai gĭt gơ̆p 2 gah; ưn ngài Ƀộ trưởng Ƀộ Cribơyai broă mờ lơgar ndai lơgar Lào dê neh sền gròi, ai tơl bơta ƀươn ai mpồl bơtiàn cau Việt Nam tàm lơgar Lào in lơh sa, ơm kis kơ̆ kơl jăp tàm lơgar Lào, jơh nùs pơgồp bơnah bơ̆t bơtàu dà lơgar Lào ngai sơlơ bơtàu tơngguh mờ lơh mpồl cau lơh kòn gùng lơh kơ̆ kơl jăp mờ ngai sơlơ bơtàu tơngguh niam bơnĕ rlau tai ai bơta gĭt gơ̆p đah Việt Nam mờ Lào in. Bàr nă kwang đơng lam bồ tơlik nùs nhơm chờ hờp bè ală cồng nha kwơmàng bơh gĭt gơ̆p 2 gah dê tơngai lài, is ồn là pin dờn cíñ trị pơn jăt tai geh tơngguh tai, lơh broă bal sền gàr dà lơgar- lơngăp lơngai pơn jăt tai là broă tờm kwơmàng bơh gĭt gơ̆p 2 gah dê.