Tàm dơ̆ wă, Củ tịc lơgar ồng Lương Cường đơs nền Dà lơgar mờ làng bol Việt Nam sùm cih kah bơta dong kờl kwơ màng mờ làng bol lơgar Tây Ban Nha neh lời ai lơgar Việt Nam in tàm broă lơh Tam gơl pa mờ bơt bơtàu tơnơ̆ rài tam lơh, kung bè tàm broă lơh bơtàu tơnguh Dà lơgar tŭ do dê.

Nàng lơh jat niam ală bơta ƀuơn, bơta pràn bơh 2 lơgar, ai bơta gĭt gơ̆p Việt Nam mờ Tây Ban Nha ngai sơlơ jrô ơnàng làm uă mờ mut lơh ngan ngồn, 2 gah ring bal sơlơ tơnguh tai ală dơ̆ lòt còp, tìp mat kwang bàng kấp dờng, lơh pràn lơh broă bal bè sền gàr lơngăp lơngai, is ồn bè bơto bơtê kwang bàng, ling geh griăt lơgar Việt Nam, lơh sa mờ măi mok gah sền gàr Dà lơgar- lơngăp lơngai, sền gàr ring lơngai Liên hợp quôk, bơsong jơnau gơ lời wơl tơnơ̆ dơ̆ tam lơh tàm Việt Nam, lơngăp lơngai internet, tam dră mờ bol sò tơm iơh bơsak, cau lơh tìs gan tiah nhàr lơgar, ntrờn làng bol ơm kis tìs mờ adat boh lam.