Tơnơ̆ dơ̆ sơn đờm mŭt Pơrjum ni sơna dơ̆ 9 ală cau ala măt Quốk hội neh cri bơyai tàm mpồl bè jơnau rơcang cih Adăt tam gơl, bơtơl ờ uă bơta tàm Adăt Bơyai lơh Quốk hội mờ Jơnau rơcang cih Adăt Tơlik sră nggal adăt boh lam (tam gơl).

Cri bơyai tàm mpồl, Củ tịc lơgar ồng Lương Cường đơs sùm jơnau kờñ là pal tơrmù di pal, lơh broă pràn, geh cồng nha. Broă rơndăp wơl pal ai mpồl kwang bàng lơh broă pa niam rơlao geh cồng nha rơlao. Nàng mpồl kwang bàng lơh broă pràn, geh cồng nha, bơh broă sền wơl tŭ do gam gơkòl rơlao 5 rơbô Adăt mờ sră nggal hờ đơm adăt, tàm hơ̆ geh rơlao 200 adăt pal tam gơl, bơtơl. Củ tịc lơgar sồr tàm pơrjum ni sơna dơ̆ 9 tơrgùm tam gơl 4 adăt mờ 5 jơnau lơh nền gơrềng tus broă bơyai lơh nàng lơh jăt Jơnau lơh nền sồ 18 tàm pơrjum Dà lơgar dê. Củ tịc lơgar sồr tơrgùm pơgồp jơnau đơs tàm jơnau rơcang cih Adăt tam gơl, bơtơl ờ uă bơta tàm Adăt Bơyai broă Quốk hội mờ Jơnau rơcang cih Adăt Tơlik sră nggal adăt boh lam (tam gơl); broă tam gơl pal di pal mờ mùl màl mờ lơh geh jơnau kờñ mpồl kwang bàng lơh broă niam rơlao, pràn kơl dang rơlao.