Dơ̆ lòt còp geh lơh tàm tŭ bơta gĭt gơ̆p lơh bơyô dờng ngan, tam klăc is ồn mờ lơh broă bal tơl làm đah Việt Nam mờ Lào pơn jăt tai bơtàu tơngguh niam bơnĕ; 2 đah đơs nền jơh nùs lơh ngan tơngguh tai, tơngguh uă bơta gĭt gơ̆p lơh bơyô bal, tam klăc is ồn mờ lơh broă bal tơl làm đah Việt Nam mờ Lào tàm bơta pa, dipal mờ bơta geh ngan bơh tơl lơgar dê.

Tàm dơ̆ lòt còp, Củ tịc lơgar ồng Lương Cường neh geh dơ̆ pơrjum tàm bơyai kwơmàng mờ Tổng Ƀí thư, Củ tịc lơgar Lào ồng Thongloun Sisoulith; tìp măt kâp dờng mờ Củ tịc Quôk hội lơgar Lào ồng Saysomphone Phomvihane mờ Thủ tướng lơgar Lào ồng Sonexay Siphandone. Tàm ală dơ̆ pơrjum tàm bơyai, tìp măt kâp dờng, 2 đah neh cribơyai mờ ring bal bè ală pơlam gùng dờng bơtàu tơngguh gĭt gơ̆p 2 lơgar tàm tơngai tus, tàm hơ̆ ring bal lơh kơ̆ kơl jăp gĭt gơ̆p cíñ trị pin dờn, đềt mềr, geh sùm ală dơ̆ lòt còp, tìp măt kâp dờng mờ ală kâp sùm sùm, sền gròi lơh pràn tìp măt lơh kwèng lơh broă bal đah làng bol 2 lơgar bơh uă broă lơh li la, rơcăng lài.