Tơnơ̆ 6 ngai nggùl lơh, Dơ̆ pơrjum ờ bè ờs dơ̆ 09, Quôk hội khoă XV neh lơh sir tơngume broă lơh neh ai. Đơs pơndŭt Dơ̆ pơrjum, Củ tịc Quôk hội ồng Trần Thanh Mẫn đơs nền: ală gùng dà broă lơh gơcèng bơta lơh nền neh geh Quôk hội ring bal là di tŭ, ngan ngồn ờ gơtùi pleh klàs, dipal ngan, bơta wèt sền ngài, bơnàng jă lơh jăt Đảng dê, Dà lơgar dê.

Dơ̆ pơrjum do, Quôk hội neh sền swì, ring bal 4 adăt, ring bal Jơnau lơh nền tàm pơrjum bè bơsong bàr pe broă gơrềng tus rơndăp tăp sèng mpồl kwang bàng mpồl lơh broă dà lơgar mờ 4 jơnau lơh nền tàm pơrjum nàng lơh jăt broă rơndăp tăp sèng mpồl kwang bàng mpồl lơh broă Quôk hội, Cíñ phủ dê; ring bal 6 Jơnau lơh nền tàm pơrjum nàng kờñ chồl tơngguh bơtàu tơngguh lơh sa- mpồl bơtiàn dà lơgar mờ ală gùng dà, broă lơh krơi is gơ wèt mờ bàr pe rơndăp broă lơh, broă bơ̆t bơtàu tờm kwơmàng dà lơgar.

Củ tịc Quôk hội ồng Trần Thanh Mẫn đơs sùm, do là tŭ tơngai kwơmàng tàm ală broă lơh lơh adăt boh lam geh gơtha kwơmàng ngan drơng dơ̆ tam gơl bơta yau gơgơs bơta pa rơndăp tăp sèng, tơrmù dipal mpồl kwang bàng mpồl lơh broă bơh ală anih lơh broă cíñ trị dê mờ di tŭ tă bơsong kal ke, gơkòl bè kơrnoăt boh lam, broă lơh, lơh gơlik bơta tam gơl pràn nàng lơh sir phan bơna bơ̆t bơtàu, ngui niam bơta pràn, bơceh lơh ù tiah bơtàu tơngguh pa ai ƀòn lơgar mờ jơh gùt lơgar in.