Drim òr (13/02), pơgồp jơnau đơs tàm mpồl bè jơnau rơcang cih Rơndăp Cíñ phủ (tam gơl), Củ tịc Quốk hội ồng Trần Thanh Mẫn đơs nền, nùs nhơm tam pà kấp pràn ai Cíñ phủ in nàng Cíñ phủ rơcang ai geh jơnau lơh nền tàm nùs nhơm mùl màl là bơta tờm was nàng bơsong ală bơta gơkòl, bơta kal ke nàng lơh pràn broă bơtàu tơnguh.

Củ tịc Quốk hội ồng Trần Thanh Mẫn đơs nền, ală bơta neh geh mùl màl sền nàng git cơng tàng den pal bơsong mơ. Is ồn, ờ tài ală broă lơh, sră nggal kră kơl dang mờ lơh lơyài broă bơtàu tơnguh dà lơgar dê. Củ tịc Quốk hội đơs là, tŭ pơgồp jơnau đơs tam gơl ală adăt geh gơrềng pal pơn jăt tai sền wơl, nàng gàr di pal mờ ală jơnau pal jăt bơh Sơnoa bơh lam dê. Gơwèt mờ Adăt broă rơndăp gơnoar atbồ tàm ală tiah (tam gơl) rơ̆p tam pà kấp pràn rơlao ai gơnoar atbồ ală tiah in jăt gùng dà broă lơh, tiah hơ tơlik jơnau lơh nền, tiah hơ̆ lơh, tiah hơ̆ dờp kơnòl. Jăt mờ hơ̆, nùs nhơm rơcang lài bơh tiah hơ̆ rơ̆p geh tơnguh uă. Broă tam gơl Adăt rơndăp broă Cíñ phủ rơ̆p jào gơnoar ai Cíñ phủ tam pà kấp pràn rơlao ai ală tiah in, Quốk hội rơ̆p tơnguh broă jăt sền.