Đơs sơn đờm tàm dar pơrjum, Củ tịc Quôk hội ồng Trần Thanh Mẫn pà git, pơrjum dơ̆ do geh uă tơngume kuơmàng, gơ rềng tus uă broă lơh sa – mpồl bơtiàn, sền gàr dà lơgar – lơngap lơngai mờ bơt bơtàu ală anih lơh broă cíñ trị bơh dà lơgar dê.

Kuơ màng, pơrjum ai jơnau đơs bè broă tam gơl bàr, pe bơta bơh Sơnua boh lam nam 2013 dê, gơ rềng tus broă koh tơrmù cau lơh broă sa priă nhai dà lơgar jat tơngume Jơnau lơh nền tàm pơrjum sồ 18. Đơs pơn dut tàm dơ̆ pơrjum, Củ tịc Quôk hội ồng Trần Thanh Mẫn ring bal mờ jơnau yal mờ Kwang Gơnoar cih Quôk hội dê. Củ tịc Quôk hội ồng Trần Thanh Mẫn sồr Cíñ phủ mờ ală anih lơh broă pơn jat tai pơgồp bal jơh nùs, lơh ngan, pơn đơl pràn uă ngan rlau jơh nàng lơh gơs sră nggal ală tơngume dơ̆ pơrjum, ngan là ală tơngume yal Quôk hội in sền sơ wì jat broă rơndap lơh dùl dơ̆ pơrjum, yal Anih duh broă Lơh kơnòl broă sùm Quôk hội in tàm nhai 4 nam 2025 do tơn, tơrmù ƀà bơta lời tơn ruc wơl tus pơrjum nhai 5.