Tàm pơrjum, ală cau ala mat neh iăt jơnau cribơyai geh gơrềng tus Kơrnoat boh lam lơh broă bơh Mpồl Duh broă Đảng ƀộ Quôk hội dê, tơngai lơh broă bơh nam 2020 – 2025; broă tàm jàu kơnòl broă ngan ngồn gơwèt mờ ală Kwang bàng Mpồl Duh broă, Kwang bàng Mpồl Lơh kơnòl broă sùm; broă tơnggơs ală anih lơh broă mìng lơh dùl kơnòl broă tă pơgồp jơnau đơs, dong broă bơh Đảng ủy mờ pờ tê ring bal Jơnau lơh nền tàm Pơrjum bơh dơ̆ pơrjum dơ̆ 1 Mpồl duh broă Đảng ƀộ Quôk hội dê.

Đơs tơn jơh pơrjum, Củ tịc Quôk hội ồng Trần Thanh Mẫn đơs nền ală đảng viên pal lơh krơh niam, kơ̆ nùs, kràñ cê jơh nùs mờ jơh nùs lơh ngan mờ broă lơh geh ngan hơ̆ sồng geh phan bơna; mơkung sồr pơn jat tai lơh pràn broă lơh rcang lài kơryan sa kuề, sa kuà mờ bơta ờ niam, pơhì pơhà, tơnguh uă cồng nha lơh broă lòt sền, jat sền mờ tơnơ̆ dơ̆ lòt sền tàm Quôk hội dê. Rcang lài jơh ală bơta ai Pơrjum dờng Đảng ƀộ ală kấp tàm Đảng ƀộ Quôk hội, nàng lơh tus pơrjum dờng dơ̆ 14 bơh Đảng dê. Bè đơng lam lơh jat niam kơnòl broă cíñ trị, Củ tịc Quôk hội sồr pơn jat tai tơrgùm đơng lam, sồr lơh jat geh cồng nha broă bơt bơtàu, lơh sir adat boh lam nam 2025 mờ jơnau sồr bơh Tổng Ƀí thư ồng Tô Lâm dê bè tam gơl pa kwơ màng bồ tơngoh kơlôi sơnơng lơh adat boh lam, sền do là dùl tam gơl pràn tàm broă lơh sir kơrnoat boh lam nam 2025, lơh geh bơnàng jă nàng ai Quôk hội khoă 16 in, tơngai lơh broă bơh nam 2026-2031.