Tàm dơ̆ lơh broă, Củ tịc Quôk hội jờng rơ mpồl kwang àng lam lài lòt lài tàm broă rơndăp tăp sèng, tơrmù dipal mpồl lơh broă pal pràn, dipal, gơtùi mờ geh cồng nha. Broă lơh tơrlòng lài do geh ală tiah, ƀộ gah ndai bơsram lơh jăt. Nam 2025 geh uă ngai chờ dờng kwơmàng dà lơgar dê, ngan là 80 nam ngai crơng gơs lơgar kung là 80 nam tơnggơs mpồl kwang àng làng bol, Củ tịc Quôk hội ồng Trần Thanh Mẫn kơ̆p kờñ mpồl kwang àng lơh sir jak ngan kơnòl broă nam 2025 pơgồp bơnah tàm kơnòl broă bơ̆t bơtàu sền gàr Dà lơgar mờ tus lơh bal mờ Quôk hội tàm broă lơh adăt boh lam, jăt sền.

Củ tịc Quôk hội ồng Trần Thanh Mẫn sồr mpồl kwang àng lam lơh jăt ală adăt neh geh Quôk hội ring bal tàm ală dơ̆ pơrjum Quôk hội dê, tàm hơ̆ lơh pràn broă lơh mblàng yal ai làng bol in wă mờ lơh jăt di kơrnoăt boh lam. Ƀộ trưởng Ƀộ Kwang àng ồng Lương Tam Quang đơs nền, tàm pơndờn đòm jăt cồng nha tàm broă tơrmù dipal mpồl lơh broă, gah kwang àng gam crăp rơcăng nàng lơh jăt broă rơndăp tăp sèng, tơrmù dipal bơh dà lơgar tus ƀòn lơgar.