Tơnơ̆ tŭ lòt sền ală anih bơceh lơh mờ bơsram is bơh ơruh pơnu, kơnòm pa tàu dê tàm do, Củ tịc Quôk hội ồng Trần Thanh Mẫn jờng rơ broă lơh Anih tờm Măi mok bơceh lơh TUMO bơh lơgar Armenia dê. 

Sồr Phó Thủ tướng Cíñ phủ ồng Trần Hồng Hà kơlôi sơnơng wèt tus lơh ală anih tờm măi mok bơceh lơh ndrờm bè broă lơh TUMO bơh lơgar bơyô dê, lơh gơlik tai anih bơto bơsram dong ơruh pơnu, kơnòm pa tàu Việt Nam bơsram is mờ tơnguh bồ tơngoh bơsram sră, ngan là ală jơnau git wă, bơta chài bè kơlôi sơnơng jak chài – măi mok, tam gơl pa bơceh lơh, bồ tơngoh jak kòn bơnus lơh gơs mờ tam gơl sồ. Do là dùl tàm ală bơta pal geh nàng bơto bơtê cau lơh broă sồ tàm rài pa, rài brồ guh bơh jơi bơtiàn dê.