Tàm dơ̆ tìp mat, Củ tịc Quôk hội ồng Trần Thanh Mẫn đơs sùm, Đảng, Dà lơgar sùm sền gròi ală mpồl lơh sa kă bro đơs bal mờ Tập đoàn lơh sa mờ măi mok- Năng lượng Dà lơgar Việt Nam đơs is. Củ tịc Quôk hội yal, Anih duh broă Lơh kơnòl broă sùm Quôk hội pa tă pơgồp jơnau đơs nàng yal mờ Quôk hội in ring bal broă tam gơl niam Adat Atbồ mờ bơcri priă Dà lơgar tàm mpồl lơh sa kă bro dê. Broă tam gơl niam do rơ̆p lơh geh ală bơta broă lơh niam rlau, tă bơsong kal ke ai lơh sa kă bro in.

Tơngai pa do, Quôk hội, Cíñ phủ kung neh tam gơl uă rơndăp broă lơh adat jat tàm nùs nhơm tă bơsong bơta gơ kòl nàng Dà lơgar in mut tàm rài pa, rài brồ să bơh jơi bơtiàn dê mờ lơh geh gơguh lơh sa rlau 8% tàm nam do. Củ tịc Quôk hội jờng rơ uă ngan Tập đoàn lơh jat broă lơh gàr tơl niam rài kis mpồl bơtiàn geh cồng nha ngan, pơgồp bơnah bơt bơtàu hìu bơsram, gùng lòt rê, hìu bơta nđàc, hìu tam klăc dờng, pơgồp bơnah dong kờl làng bol tơngai trồ tiah lơh aniai, mìu càl rơbŭt dờng, kòp aniai.