Dơ̆ lòt lơh broă bơh Củ tịc Quôk hội ồng Trần Thanh Mẫn mờ Mpồl kwang bàng kâp dờng lơgar he dê neh lơh geh cồng nha niam bơnĕ, lơh geh tơl làm mờ sơrlèt rlau ală jơnau kờñ geh ai tơlik, lời wơl tềl niam ngan tàm uă gah. Tàm ală dơ̆ lòt còp ngan ngồn tus Senegal mờ Morocco, Củ tịc Quôk hội neh geh ală dơ̆ pơrjum bơyai, tìp mat  kâp dờng mờ  đơng lam kâp dờng bơh tơl lơgar dê; tus bal Tìp măt tàm bơyai gùng dà broă lơh chồl tơnguh lơh broă bal đah Việt Nam mờ Senegal; Tìp măt tàm bơyai gùng dà broă lơh chồl tơnguh lơh broă bal đah Việt Nam mờ Morocco. Neh geh 8 jơnau ring bal geh kĭ tàm jơh bal 2 lơgar. Kuơmàng, tàm lơgar Thụy Sĩ, Củ tịc Quôk hội neh tus bal Tìp măt tàm bơyai “Bơt bơtàu mờ ai lơh broă Anih tờm priă jền ală lơgar – jơnau pơlam ai Việt Nam in”. Dơ̆ lòt còp bơh Củ tịc Quôk hội mờ Mpồl kwang bàng kâp dờng lơgar he dê neh lơh tơnguh rlau tai bơta wă wờng, pin dờn cíñ trị, ngan là tàm kâp dờng, pơgồp bơnah lơh niam rlau tai, tơl làm rlau tai lơh broă bal mờ ală lơgar, ngan là tàm gah nghị viện.