Đơs tàm dơ̆ bơyai lơh, Củ tịc Quôk hội tơngŏ bơta ngoh rơngăc kah kơlôi Tổng Ƀí thư ƀồc ồng Lê Duẩn- Cau đơng lam bồ jak chài ngan, cau kòn tàm pơrdờn jak chài ngan broă lơh kăc màng bơh Củ tịc Hồ Chí Minh dê. Mơkung đơs sùm, ƀồc ồng Lê Duẩn ờ mìng là kwang đơng lam bồ Cín trị- ling klàng jak ngan lơm mờ gam là cau lý luận dờng mờ bồ tơngoh kơlôi sơnơng bơceh lơh, pơgồp bơnah lơh geh rài bồ tơngoh kăc màng Việt Nam.

Tàm nùs nhơm dờng màng, pơn yờ să jơh gùt lơgar dê wèt mờ dơ̆ tơngkah kir sơnrai 50 nam Ngai tơngklàs tiah đah Jum, tơrgùm dùl Dà lơgar, Củ tịc Quôk hội ồng Trần Thanh Mẫn mờ Mpồl lơh broă neh chu ñàng kah kơlôi ală cau ling khin cha jak chài, cau ling chơ̆t màng neh chơ̆t phi să tàm ƀòn dờng yau Quảng Trị. Pơn jat hơ̆, mpồl neh còp hìu bơnhă geh sră dong kờl Dà lơgar tàm sàh Hải Thượng, kơnhoàl Hải Lăng.