Dờp jơnau jà bơh Củ tịc Mpồl tam klăc Nghị viện Dunia (IPU) ồng Tulia Ackson mờ Kwang Gơnoar cih dờng bal Mpồl tam klăc Nghị viện Dunia ồng Martin Chungong, Củ tịc Quôk hội lơgar Armenia ồng Alen Simonyan, Củ tịc Quôk hội ồng Trần Thanh Mẫn ala mat Kwang đơng lam bồ Đảng, Dà lơgar Việt Nam mờ pơ ùr tus bal Pơrjum dờng bal dơ̆ 150 bơh Mpồl tam klăc Nghị viện Dunia (IPU-150), còp ngan ngồn lơgar Armenia bơh ngai 02 tus ngai 05 nhai 4 nam 2025.

Broă Củ tịc Quôk hội ồng Trần Thanh Mẫn tus bal Pơrjum dờng bal Mpồl tam klăc Nghị viện Dunia  dơ̆ 150 là dùl tềl lời wơl is ồn, pà gŏ nùs nhơm pa mờ bơta hơ pơrgon uă ngan bơh Việt Nam dê tàm dơ̆ cribơyai Nghị viện uă lơgar kwơ màng do, tàm tơngai ală bơta tàm dunia tŭ do sồr pal tơl Dà lơgar pal tàm sơm bat tê bal cribơyai, tam pà bal mờng chài rơ̆ ru, ai tơlik ală jơnau bơceh lơh nàng bơsong ală bơta lòng bal. Tàm bơta đah 2 lơgar, dơ̆ lòt còp ngan ngồn lơgar  Armenia bơh Củ tịc Quôk hội ồng Trần Thanh Mẫn dê là dơ̆ lòt còp sơn rờp bơh cau lam bồ anih lơh broă lơh Adat boh lam lơgar Việt Nam, kung là dơ̆ lòt còp kấp dờng ngan rlau jơh bơh Kwang đơng lam bồ Việt Nam dê kờp bơh tŭ 2 lơgar lơh geh bơta gĭt gơ̆p cribơyai broă mờ lơgar ndai. Bè cíñ trị - Cribơyai broă mờ lơgar ndai, lơgar Armenia sền Việt Nam là lơgar lơh broă bal kwơ màng tàm tiah đah Jum mat tơngai Lik câu Á. Bàr Dà lơgar gàr niam sùm lơh broă tàm pơgơl mpồl kwang bàng, tìp mat kwang bàng ală kấp, geh bal kwang bàng kấp dờng.