Do là pơrjum sơnrờp ngan bơh Mpồl lơh kơnòl broă sùm Đảng ủy Quốk hội mờ Mpồl lơh kơnòl broă sùm Đảng ủy Cíñ phủ dê. Ƀí thư Đảng ủy Quốk hội, Củ tịc Quốk hội ồng Trần Thanh Mẫn mờ Ƀí thư Đảng ủy Cíñ phủ ồng Phạm Minh Chính đơng lam bal pơrjum.

Đơs sơn đờm Pơrjum, Củ tịc Quốk hội ồng Trần Thanh Mẫn đơs sùm, do là dơ̆ pơrjum kwơ màng ngan, geh Mpồl lơh kơnòl broă sùm Đảng ủy Quốk hội mờ Mpồl lơh kơnòl broă sùm Đảng ủy Cíñ phủ đơng lam bal nàng sền wơl ală broă lơh gơrềng tus broă rơcang ai dơ̆ pơrjum ni sơna dơ̆ 9, Quốk hội Khoă 15 in, nàng rơcang ală tơngu me pơrjum geh tơl niam, geh cồng nha mờ ai geh jơnau ring bal uă ngan bơh kwang bàng ala măt Quốk hội dê tàm jơnau đơs dŭt ndơl ală tơngu me, broă lơh bơh pơrjum dê, kung bè jơnau lơh nền bè kwang bàng. Pơrjum ni sơna dơ̆ 9 kờp dŭ rơ̆p sơn đờm tàm ngai 12 nhai 2 tus mờ tơn jơh tàm ngai 18 nhai 2 nam 2025. Ală tơngu me Pơrjum ni sơna dơ̆ 9, kờp tus tŭ do, bàr gah neh ring bal ală tơngu me, tàm hơ̆ geh: sền wơl mờ ring bal 4 adăt; 5 jơnau lơh nền tàm pơrjum drơng broă rơndăp tăp sèng, lơh gơs gùng dà broă lơh nàng lơh broă tàm ală anih lơh broă, mpồl lơh broă; bơyai lơh mpồl lơh broă cíñ trị; sền wơl jơnau lơh nền tàm pơrjum 4 tơngu me ndai gơwèt gơnoar broă, tàm hơ̆ geh tơngu me bè broă kwang bàng, mờ geh dùl jơnau yal Quốk hội di jăt mờ jơnau geh ai.