Dơ̆ ơm rlô chờ ngai 30/4 mờ ngai 01/5 pa do tàm Dà Làc – Lâm Đồng geh lơh uă broă lơh niam chài, đơs crih tamya niam ngan bè dar dut ndơl Dalat Best Dance Crew 2025, Broă lơh đơs crih tamya “ Dà lơgar tơrgùm dùl” tơngkah 50 nam ngai tơngklàs tiah đah jum, tơrgùm dùl dà lơgar,uă show đơs crih tamya bơh ală cau đơs crih tiơng pơn rơ dê… là jơnau pơgồp bơnah gơ hòi gơ jà gal nac lòt nhơl tus sền, ơm rlô să.

Jat tơrgùm kờp bơh gah lòt nhơl càr Lâm Đồng dê, Dà Làc – Lâm Đồng wă mờr 240 rbô dơ̆ nac lòt nhơl tus sền, ơm rlô să tàm dơ̆ ơm rlô chờ pa do, gơguh rlau 14% pơndrờm mờ dơ̆ ơm rlô chờ nam lài. Tàm hơ̆, nac ală lơgar kờp dŭ geh 14 rbô dơ̆ nac, gơguh 75% mờ geh rlau 160 rbô dơ̆ nac ơm wơl bic mang, gơguh 23% pơndrờm mờ dơ̆ ơm rlô chờ nam lài.