Jăt jơnau lơh nền bơh Thủ tướng Chính phủ dê, Trung tướng ồng Trương Mạnh Dũng, Tư lệnh ling tiah 1 geh ntrờn, pồ at gơnoar broă Phó Tổng Tham mưu trưởng. Thiếu tướng ồng Trần Xuân Mạnh, Phó Tư lệnh, Tham mưu trưởng Ling tiah 1 geh jào dờp kơnòl broă Tư lệnh Ling tiah do.

Đơs tàm Pơrjum, Đại tướng ồng Phan Văn Giang dờp, đơs niam ală broă pơgồp bal bơh Trung tướng ồng Trương Mạnh Dũng dê tàm broă đơng lam, sồr lơh mpồl ling phào crong Ling tiah dê lơh gơs jăk kơnòl broă, gàr kơl jăp ù tiah, bơ̆t bơtàu broă sền gàr dà lơgar gùt làng bol kơl jăp. Gơwèt mờ Thiếu tướng ồng Trần Xuân Mạnh, Đại tướng sồr tàm gơnoar broă pa pơn jăt tai tơnguh broă lơh mờng chài, bal mờ mpồl Đảng ủy, Mpồl đơng lam Ling tiah 1 tơrgùm đơng lam lơh jăk kơnòl broă ling klàng, sền gàr dà lơgar; tơnguh uă bơta niam tơrgùm bal, bơta pràn tam dră; rơcang lài git ală bơta, bañ lời ờ thàn, ni sơna. Mờ tơnguh broă bơ̆t bơtàu tiah rơcang gàr lài, pơgồp bal mờ bơtàu tơnguh lơh sa mpồl bơtiàn mờ sền gàr dà lơgar, lơngăp lơngai; gàr kơl jăp nùs nhơm tam klăc bal tàm dơlam, lơh jăt nền nòn broă lơh glài, drơng gàr rài kis cau ling, pơgồp bal tàm broă lơh gơs jăk ală kơnòl broă geh jào.