Đơs tàm dơ̆ tơngkah kir sơnrai, Đại tướng ồng Phan Văn Giang, Kwang bàng Ƀộ Cíñ trị, Phó Ƀí thư Anih duh broă Đơng lam Đảng Ling klàng Dà lơgar, Ƀộ trưởng Ƀộ Ling klàng đơs loh, Lâm Đồng là càr tiah đah Jum Tây Nguyên, geh anih ơm dờng màng ngan bè lơh sa, mpồl bơtiàn, sền gàr dà lơgar, lơngăp lơngai. Ala măt đơng lam Đảng, Dà lơgar, Đại tướng ồng Phan Văn Giang nting bơr gờm chờ ală broă lơh geh dờng ngan mờ Đảng ƀộ, gơnoar ătbồ, ling klàng mờ làng bol ală jơi bơtiàn càr Lâm Đồng dê neh lơh geh tàm sùm 50 nam do.

Đại tướng tơngkah, tềng đăp măt, Lâm Đồng pa tơrgùm jơh pràn tơnguh mhar, tam gơl pràn lơh gơs cồng nha ală jơnau kờñ, broă jàu, kơnòl broă bơtàu tơngguh lơh sa- mpồl bơtiàn, sền gàr niam dà lơgar, lơngăp lơngai, lơh gơlik bơnàng jă kơ̆ kơnhăp nàng ƀòn lơgar in cơnđòa kơ̆ kơl jăp mŭt tàm rài pa. Jơh nùs lơh tam gơl pa lơh sră pơ àr gơnoar ătbồ, bơtàu tơngguh jak chài măy mŏk, tam gơl pa bơceh lơh mờ tam gơl sồ, lơh niam wơl tiah bơcri priă kă bro, tơngguh uă bơta pràn jak tàm pơrlòng. Sùm lơh kơ̆ kơl jăp, sền gròi bơ̆t bơtàu mpồl tam klăc dờng jơh gùt jơi bơtiàn, lơh jăt niam ală broă dong kờl, sền gàr niam lơngăp lơngai mpồl bơtiàn, bơta kwơ bal mpồl bơtiàn, ngan là gơ wèt mờ ală cau dờp bơta dong kờl mpồl bơtiàn dê, tiah làng bol jơi bơtiàn dồ êt nă cau. Jơh nùs lơh ngan ai Lâm Đồng gơs là càr bơtàu tơngguh mhar mờ kơ̆ kơl jăp.