Ală ngai bồ nhai 6, tàm Hìu bơsram Kâp pe Buôn Ma Thuột, kơnòm bơsram ngui tŭ jiơ lơm pah nàng bơsram wơl sền wơl ală jơnau neh bơsram, tàp lơh jơnau ai pơrlòng mờ lơh sir niam bơta chài lơh jơnau pơrlòng. Oh Trần Quốc Trung, kơnòm bơsram ơdŭ 12A14, pà gĭt gam tơrgùm bơsram sền wơl ală jơnau ai pơrlòng ală nam lài, sền tai jơnau ai pơrlòng bơh uă klờng krơi is dê nàng rơcăng ai jơnau kờñ sền swì rwah mŭt Đại họk. Oh neh mhar ngan geh broă rơndăp lơh bơsram loh làng ai tơl môn in, rơcăng lài sền jơnau yal mờ gùng dà rwah kơnòm bơsram bơh ală hìu bơsram dê.

 “Oh tơrgùm bơsram sền wơl ală jơnau ai pơrlòng tàm ală nam lài dê, sền tai uă jơnau ai pơrlòng tàm ală hìu bơsram krơi is, lơh broă rơndăp lơh nàng oh bơsram tơl môn mờ lùp uă jơnau đơs tàm ală pang internet mpồl bơtiàn bơh ală bi dê tàm khoă lài nàng gơtùi lơh geh jơnau kờñ mŭt bal Đại họk Kinh tế ƀòn dờng Hồ Chí Minh mờ pe môn tờm là Toán, Dà Anh mờ Lý”.

Tơnơ̆ ală tŭ jiơ bơsram wơl gơ jă gơ jal bơh kơnòm bơsram dê là bơta lòt bal jơh nùs ngan bơh pơgru mờ hìu bơnhă dê. Ùr pơgru Nguyễn Thị Xuân Hương, Lam bồ Hìu bơsram Kâp pe Buôn Ma Thuột pà gĭt, tơnơ̆ tŭ sền swì cồng nha kơnòm bơsram bơh ală dơ̆ sền swì, hìu bơsram neh geh ală gùng dà broă lơh dong kờl dipal mờ tơl mpồl. Hìu bơsram kung pơgồp bal mờ mè bèp kơnòm bơsram dê mờ mpồl cau lơh sơnơm nàng sền gàr pràn kơldang, bồ tơngoh hwềng nùs ai kơnòm bơsram in lài mờ dơ̆ pơrlòng.

“Gơ wèt mờ ală kơnòm bơsram pràn kơldang ờ huan geh, pơgồp bal mờ mpồl cau lơh sơnơm nàng pơlam ală oh gàr niam pràn kơldang să jan nàng mŭt tàm dơ̆ pơrlòng jơh bơsram. Gơ wèt mờ mpồl kơnòm bơsram jơnau gĭt wă bơsram ờ hềt tơl den jàu tơn ai tơl pơgru geh nùs nhơm is bơh ală jơnum mìng môn dê, bơto dong kờl ală oh ờ mìng tàm hìu bơsram mờ bơto dong kờl bơdìh tŭ jiơ bơsram tơn, bơto gời ờ sa priă ai ală oh in. Mơkung geh jơnau sồr pơgru kong kơnòl ơdŭ rơcăng lài pơgồp bal đah pơgru kong kơnòl ơdŭ, mè bèp kơnòm bơsram bal mờ đơng lam hìu bơsram nàng tơngguh uă bơta khà pơrlòng gơkờñ bơh ală oh dê in”.

Jăt Sờh Bơto bơtê mờ Bơsram càr Dăk Lăk dê yal, broă lơh bơsram wơl geh sồr lơh jăt gùng jăt nền bơta jak kơnòm bơsram dê, sền gròi uă mpồl kơnòm bơsram geh jơnau tơnggŏ digơlan pơrlòng ờ gơkờn. Bal mờ broă lơh ờs mờng, càr Dăk Lăk neh lơh sir jơh ală broă rơcăng ai dơ̆ pơrlòng in. Jơh gùt càr geh 1 Mpồl duh broă Pơrlòng bal mờ 64 anih pơrlòng ngan ngồn mờ 55 anih pơrlòng rơcăng lài; pơgăp 1 rbô 500 cơldŭ pơrlòng ngan ngồn mờ 40 cơldŭ kơ̆p. Pơgăp 5 rbô nă kwang bàng, pơgru, cau lơh broă mờ ală mpồl gơrềng bal rơ̆p tus bal drơng broă dơ̆ pơrlòng in.

Mò Lê Thị Thanh Xuân, Kwang Lam bồ Sờh Bơto bơtê mờ Bơsram càr Dăk Lăk pà gĭt, dơ̆ pơrlòng nam do geh lơh dờng mờ khà kơnòm pơrlòng uă, ù tiah bơyai lơh ơnàng den tàng hòi tơrgùm jơh ală anih lơh broă cíñ trị, sồr broă lơh pơgồp bal pal tơngguh tai, kơ̆ kơl jăp, ndrờm bal.

 “Bơyai lơh sền swì sền wơl tơl làm mờ di tŭ sồr ală anih pơrlòng lơh niam wơl ală cơldŭ pơrlòng, kơƀàng cơghế, camera, măy mŏk phan ngui; gàr niam ală anih geh rwah tơl bơta bơyai lơh dơ̆ pơrlòng niam lơngăp lơngai. Bè broă lơh cau lơh broă neh rơcăng lài sồr ntrờn tơl khà kwang bàng, pơgru, mờ rơcăng bơyai lơh bơsram tàp nền nòn bè jơnau pal jăt, kơnòl broă lơh ai jơh gùt mpồl in. Sền bal, broă lơh rơcăng, bơta pơgồp bal mờ lam lơh kơnòl broă tus dì tŭ jiơ do ndrờm rơcăng lài, kơ̆ kơl jăp mờ di broă rơndăp lơh”.

Bal mờ bơta rơcăng lài bơh gờñ bơh ală hìu bơsram dê, bơta lòt bal bơh pơgru mờ bơta jơh nùs lơh ngan bơh gah bơto bơtê dê, Dăk Lăk gam mŭt tàm tŭ tơngai dŭt ndơl lài mờ dơ̆ pơrlòng bal mờ jơnau kờñ ờ mìng gàr niam dùl dơ̆ pơrlòng niam lơngăp lơngai, lơh niam mờ gam ai tơl bơta nàng tơl nă kơnòm bơsram in, ngan là kơnòm bơsram tiah kal ke, geh tŭ ngui niam ngan rlau jơh pràn jak he dê.