Pơrjum neh iăt kơno rlau 100 jơnau đơs tă pơgồp bơh mpồl lơh sa kă bro, mpồl lơh broă bal mờ hìu kă bro dê, tơrgùm tàm ală broă lơh bơsong lơh niam wơl tiah bơcri priă, tă bơsong kal ke ai lơh sa kă bro in mờ lơh pràn bơtàu tơngguh lơh sa làng bol dê lơh is. Ală jơnau đơs tă pơgồp dan pơn jăt tai lơh sir kơrnoăt boh lam, lơh ƀươn sră nggal sră pơ àr gơnoar ătbồ, tă bơsong ală gơkòl bè ù tiah, rơndăp ù tiah, bơcri priă, bơ̆t bơtàu mờ tiah ơm kis; mơkung tơngguh jơnau tơl pràn geh càn priă, broă dong kờl dia mờ ală bơta pràn bơtàu tơngguh.

Đơs pơndŭt Pơrjum, ồng Lương Nguyễn Minh Triết, Kwang bàng Đảng Dà lơgar, Bí thư Tỉnh ủy càr Dăk Lăk, Lam bồ Mpồl Cau ala măt Quốc hội càr Dăk Lăk jàu kơnòl ai Anih duh broă Làng bol càr in sơlơ tam gơl pa gùng dà broă lơh tìp măt tơm bơh bơr, iăt kơno, lơh jăt ală jơnau đơs, jơnau dan bơh ală mpồl lơh sa kă bro dê. Jàu loh kơnòl bơh tơl nă cau nă să is, mpồl lơh broă dê tàm broă bơsong jơh, sơrbăc mhar ală jơnau đơs tă pơgồp. Mpồl Cau ala măt Quốc hội, Mpồl duh broă Làng bol càr Dăk Lăk kung rơ̆p lơh jăt sền ală jơnau hơ bơh Anih duh broă Làng bol càr dê kung bè ală sờh, gah, ƀòn lơgar gơ wèt mờ mpồl bơtiàn mpồl lơh sa kă bro.