Pơrjum neh dờp 101 jơnau đơs jơnau dan bơh mpồl lơh sa kă bro, lơh broă bal mờ hìu bơnhă lơh sa kă bro, tơrgùm tàm ală broă lơh lơh niam tiah bơcri priă, tă bơsong kal ke ai lơh sa kă bro mờ sơlơ tơnguh tai bơtàu tơnguh lơh sa làng bol dê lơh is. Ală jơnau đơs jơnau dan pơn jat tai lơh sir kơrnoat boh lam, lơh ƀuơn wơl sră pơ àr gơnoar atbồ, tă bơsong ală bơta kòl yan bè ù tiah, rơndăp ù tiah, bơcri priă, bơt bơtàu mờ tiah ơm kis; mơkung tơnguh tai bơta pràn tus bal càn priă, broă dong kờl priă dia mờ ală bơta pràn bơtàu tơnguh.

Mò Võ Thị Hà Giang, ala mat Tập đoàn Kơphê Trung Nguyên, đơs jơnau dan: “Bol añ dan mờ Dà lơgar mờ càr pơn jat tai kơlôi sơnơng broă lơh krơi is ai càr Dăk Lăk in jat tàm 5 bơta tờm: bè broă lơh dà lơgar, bè phan bơna bơt bơtàu, bè mpồl cau lơh broă, bè priă jền mờ jak chài măi mok”.

Ală mpồl lơh sa kă bro kung dan lơh pràn bơcri priă bơt bơtàu phan bơna gùng lòt rê, logistics, phan bơna bơt bơtàu sồ; dong kờl gơ hòi gơ jà kă bro phan, bơtàu tơnguh kă bro phan điện tử, lòt nhơl mờ gơ hòi gơ jà bơcri priă. Uă jơnau đơs sồr lơh tơnguh tai ngui jak chài măi mok, tam gơl sồ, tam pà bal ală jơnau yal nàng drơng broă lơh sa kă bro, di tŭ bơsong ală kal ke, kòl yan gơlik geh tàm tơngai lơh broă.

Ồng Trần Khánh Minh, ala mat Mpồl lòt nhơl càr Dăk Lăk đơs jơnau đơs: “Kal ke ngan rlau jơh bơh mpồl lơh sa kă bro tŭ do, bol añ kờñ lơh lòt nhơl tơlir, lơh niam ngan mơya ờ gĭt bè lơi là di. Tài bơh ờ tơl dùl broă lơh adat boh lam loh làng, ală anih lơh broă atbồ tàm ală tiah kung kwi kwơ tàm broă ai gơnoar atbồ ù tiah halà broă lơh bơt bơtàu ndai tàm ù lơh broă sa suơn sre- phan brê pơgồp bal lơh lòt nhơl. Mpồl lơh sa kă bro lơh ngan, jơh nùs jơh tồr den rơngòt gơtìp lơh tìs. Bol añ dan sơlơ tơnguh tai ai lơh jat mờ ngui ală jơnau sồr lòt nhơl tơlir in”.

Hơ ală jơnau lùp, jơnau dan bơh ală mpồl lơh sa kă bro dê, ồng Đỗ Hữu Huy, Kwang bàng rcang lài Đảng Dà lơgar, Chủ tịch Anih duh broă Làng bol càr Dăk Lăk pà gĭt, càr neh mờ gam tơrgùm đơng lam kràñ cê jơh nùs ală broă lơh sơlơ tơnguh gơguh tai, tơnggơs Mpồl Sồr lơh tơnguh tai 2 nơm khà mờ ală mpồl lơh broă mìng gah broă nàng lòt bal, tă bơsong kal ke ai mpồl lơh sa kă bro, cau bơcri priă in.

Jat ồng Đỗ Hữu Huy, càr is ồn sền gròi lơh niam tiah bơcri priă lơh sa kă bro, lơh pràn tam gơl niam sră pơ àr gơnoar atbồ jat gùng lòt ai ală mpồl lơh sa kă bro lơh anih tờm drơng broă. “Anih duh broă Làng bol càr Dăk Lăk sền gĭt lòt bal, iăt kơno mờ dong kờl mpồl lơh sa kă bro, mpồl lơh broă bal, hìu bơnhă lơh sa kă bro là kơnòl broă sùm, lơh jat sùm. Ờ mìng là lơh tàm pơrjum, nùs nhơm lơh sùm bơh Anih duh broă Làng bol càr dê là tam gơl bơh kơlôi sơnơng sră pơ àr gơnoar atbồ tus kơlôi sơnơng drơng broă mờ lòt bal mờ ală mpồl lơh sa kă bro”.

Đơs pơndŭt pơrjum tìp mat mờ cau tĕ khà mờ ală mpồl lơh sa kă bro, mpồl lơh broă bal mờ hìu bơnhă lơh sa kă bro, ồng Lương Nguyễn Minh Triết, Kwang bàng Đảng Dà lơgar, Bí thư Tỉñ ủy càr, Lam bồ Mpồl cau ala mat Quốc hội càr Dăk Lăk đơs nền nùs nhơm lơh ngan chính trị uă ngan rlau jơh bơh càr dê tàm broă tă bơsong ală kal ke, kòl yan tàm broă lơh sa, kă bro dùl bă ngan ngồn.

Bí thư Tỉñ ủy càr Dăk Lăk jàu kơnòl ai Anih duh broă Làng bol càr sơlơ tơnguh tai tam gơl pa gùng dà broă lơh tìp mat tơm bơh bơr, iăt kơno ală jơnau đơs, jơnau dan bơh ală mpồl lơh sa kă bro dê. Tam jàu loh kơnòl broă bơh tơl nă cau dồ nă să, mpồl lơh broă tàm broă bơsong jơh, mhar ngan ală jơnau đơs jơnau dan geh pơyoa tus. Mpồl Cau ala  mat Quốc hội, Mpồl duh broă Làng bol càr Dăk Lăk kung rơ̆p lơh dơ̆ jat sền ală jơnau hơ bơh Anih duh broă Làng bol càr dê kung bè ală sờh, gah, ală tiah gơwèt mờ ală mpồl lơh sa kă bro. “Càr Dăk Lăk đơs nền dùl dơ̆ tai, sền dờng mang ngan gơnoar bơh tiah lơh sa kă bro dê đơs bal, is ồn là tiah lơh sa làng bol dê lơh is. Do là bơta gơn kơnờm kwơ màng ngan nàng càr in lơh geh jơnau kờñ gơguh tai 2 nơm khà tàm tơngai tus. Bol añ kơ̆p kờñ ală mpồl bơtiàn pơn jat tai rcang lài jòi gĭt, lơh jat niam ală jơnau sồr adat boh lam, tam gơl pa kơlôi sơnơng lơh sa kă bro, ngui ală broă lơh ai lơh lài, ală broă lơh neh đơs tàm Jơnau lơh nền tàm pơrjum sồ 68 bơh Bộ Chính trị dê bè bơtàu tơnguh lơh sa làng bol dê lơh is nàng bơtàu tơnguh mpồl lơh sa kă bro”.

Bơh ală jơnau hơ tàm pơrjum, càr Dăk Lăk gam yal pràn kơl dang bè dùl gơnoar atbồ bơceh lơh, ai mpồl lơh sa kă bro lơh anih tờm. Broă tam gơl pa broă lơh tìp mat tơm bơh bơr, tam jàu loh kơnòl mờ jat sền cồng nha lơh jat ờ mìng dong tă bơsong ală bơta kòl yan tềng đăp mat lơm mờ gam lơh geh bơta pin dờn ai ală mpồl lơh sa kă bro in tai. Do kung là gùng lòt ngan ngồn nàng ai nùs nhơm Jơnau lơh nền tàm pơrjum sồ 68 bơh Bộ Chính trị dê mut tàm bơta geh ngan, lơh iăt kơno gơ gơs broă lơh, lơh ală jơnau hơ gơ gơs cồng nha bơtàu tơnguh geh ngan.