Nàng lơh mhar sờr ntrờn măt ù 53 broă bơ̆t bơtàu, rơndăp broă lơh tờm kwơmàng, càr Dăk Lăk neh tơnggơs 5 Jơnum lơh broă bơh Tỉnh ủy, bơh Bí thư mờ ală Phó Bí thư Tỉnh ủy lơh Lam bồ Jơnum. Do là ală rơndăp broă lơh geh uă sră nggal, gơkòl bè ù tiah, tơm wơl, ntrờn ơm kis pa tàm tơngai jòng.

Tơnơ̆ 45 ngai lam lơh broă lơh dờng sờr ntrờn măt ù, 7 rơndăp broă lơh neh lơh sir 100% măt ù; 15 rơndăp broă lơh geh bơh 90% rlau hơđăng. Cồng nha do lơh geh tŭ ală Jơnum lơh broă să tờm tus tơn kâp hơđơm, bal mờ ƀòn lơgar mờ cau tờm bơcri priă tă bơsong tơl bơta gơkòl, gĭt nền loh tơngume kờñ pal lơh bơsong mờ kơnòl bơh tơl mpồl lơh broă dê. Bal mờ hơ̆, ƀàng đơng pơlam tơngai pơrgon lơh geh cih yal pah ngai dong đơng lam càr di tŭ đal gŏ ală rơndăp broă lơh geh pơhìn lơyài nàng sồr lơh bơsong. Bơh broă lơh dờng, Bí thư Tỉnh ủy Dăk Lăk ồng Lương Nguyễn Minh Triết đơs, ală gơkòl bơh ală rơndăp broă lơh dê mùl màl gơ ơm uă tàm broă lam lơh jăt.

“Uă broă lài do bol he đơs là kal ke, đơs là gơkòl kơrnoăt boh lam, gùng dà broă lơh, mơya tŭ đơng lam să tờm tơn tus tiah lơh broă mờ bal mờ ală anih lơh broă mờng lơh kơnòl broă, tơl nă kwang bàng lơh broă lơh sờr ntrờn măt ù tă bơsong tơl tơngume, gĭt nền loh kơnòl, loh tơngai den uă broă gơtùi lơh bơsong geh”.

Dilah sờr ntrờn măt ù là dùl tàm ală broă kwơmàng nàng ai rơndăp broă lơh mŭt lơh broă, den ai priă bơcri dà lơgar dê gơlik wơl là kơn jơ̆ dờng gơ wèt mờ càr Dăk Lăk tàm ală nhai lồi nam. Tàm dơ̆ pơrjum ờs mờng nhai 8 pa do, đơng lam càr lời uă tŭ jiơ đơs tơngai pơrgon ai priă. Broă rơndăp lơh bơcri priă dà lơgar nam 2026 bơh Dăk Lăk dê rlau 11 rbô 294 tơmàn đong. Tus tŭ do, càr neh tam pà nền cê rlau 9 rbô 918 tơmàn đong, geh mờr 88%. Pal sền ngăc, gam 1 rbô 375 tơmàn đong ờ hềt tơl bơta jàu priă.

Jăt ồng Cao Đình Huy, Kwang Lam bồ Sờh Priă jền càr Dăk Lăk đơs nhai 8 jăt broă rơndăp lơh pal ai priă êt ngan là bơh 3 rbô tơmàn đong mơya mùl màl mìng lơh geh pơgăp 604 tơmàn đong. Nàng lơh geh jơnau kờñ ai priă jăt broă rơndăp lơh qúi III, is tàm nhai 9 càr pal lơh jăt pơgăp 5 rbô 154 tơmàn đong. Sờh Priă jền neh lơh broă mờ ală cau tờm bơcri priă gơrềng bal, sồr lơh jăt di tơngai pơrgon.

“Tŭ do, Sờh Priă jền rơ̆p pà jăt tàm bơta jồm priă rơcăng lài mờ mìng pà ai ală rơndăp broă lơh neh geh bơnah sền swì ai ngui in lơm. Pah poh, bol hi rơ̆p sồr ală Mpồl ătbồ geh jơnau sồr là bol hi rơ̆p pà mơ tơn gơ wèt mờ ală bơnah broă lơh gơs. Tàm tŭ dilah ală oh mi ờ ai priă geh den bol hi ai wơl nàng pà ai ală rơndăp broă lơh geh bơnah broă in”.

Tŭ do pơgăp 60% kơn jơ̆ ai priă priă bơcri dà lơgar càr Dăk Lăk dê tơrgùm tàm 4 Mpồl Ătbồ rơndăp broă lơh, geh Mpồl Ătbồ rơndăp broă lơh Gùng lòt mờ Broă lơh sa sươn sre, Mpồl Bơcri priă Bơ̆t bơtàu đah măt tơngai Lik, Mpồl Buôn Ma Thuột mờ Mpồl Tuy Hoà. Tềng đăp jơnau sồr pal lơh gơlik tam gơl loh làng tàm bơcri priă dà lơgar, sờr ntrờn măt ù mờ ală broă bơ̆t bơtàu tờm kwơmàng, ồng Đỗ Hữu Huy, Chủ tịch Anih duh broă Làng bol càr Dăk Lăk sồr yal loh làng jơnau tơl pràn ai priă bơh tơl rơndăp broă lơh, tơl bơnah broă lơh dê; kràñ cê kơ̆ nùs ai wơl priă bơh ală rơndăp broă lơh ờ geh tơl pràn lơh jăt nàng ai ală rơndăp broă lơh geh jơnau kờñ mờ tơl pràn ai priă niam rlau in. Đơng lam càr kung sồr sơlơ lòt sền tai mùl màl tàm anih lơh broă, sền swì pràn jak lơh broă bơh cau tờm lơh broă dê. Ală cau tờm lơh broă ờ lơh geh jơnau sồr pal geh sền swì ala, pleh lời pràn jak lơh broă ờ jak gơgơs anih gơkòl lơh lơyài tơngai pơrgon lơh mờ ai priă.

“Cơldŭ lơh broă pal yal ai Đơng lam Anih duh broă Làng bol càr in broă rơndăp lơh jàu kơnòl ai Đơng lam Anih duh broă drơng kơnòl tơl nă cau tờm bơcri priă mờ broă rơndăp lơh lòt sền, hòi jà ngan tơl rơndăp broă lơh in. Lòt tus tơn anih lơh broă, sền là cau tờm lơh broă cau geh măy mŏk phan ngui halà ờ, cau geh cau lơh phan halà ờ; cèng jơh ală sră cih pah ngai lơh broă anih lơh broă nàng kờp sền wơl. Sền swì lơh bè lơi là bơh tơngai do tus lồi nam ai priă geh nđờ. Dilah tàm ală tŭ gơkòl mờ gĭt nền loh là cau tờm lơh broă ờ geh tơl pràn jak, den sồr cau tờm bơcri priă pal ala”.

Bơh broă lơh dờng sờr ntrờn măt ù tus lơh pràn ai priă priă bơcri dà lơgar, Dăk Lăk gam ơm broă tờm tàm dùl broă lơh pa: jăt sền nền broă lơh bơ̆t bơtàu, lơh bơsong jơh tơn tơl anih gơkòl mờ gơ jăt bal mờ tơngai pơrgon lơh bal mờ kơnòl loh làng. Do geh sền là gùng dà broă rơndăp lơh kwơmàng nàng lơh gơlik tam gơl tàm ală nhai lồi nam, lơh mhar tơngai pơrgon ală rơndăp broă lơh, ngui geh cồng nha priă bơcri mờ gờñ ai ală broă lơh bơ̆t bơtàu tờm kwơmàng ai ngui, lơh geh cồng nha.