Nam bơsram pa 2026 - 2027, Hìu bơsram ơm sa bic tơn kâp 1 mờ kâp 2 Ia R’vê geh 34 ơdŭ mờ 880 nă kơnòm bơsram, tàm hơ̆ 216 nă oh ơm sa bic tơn tàm hìu bơsram. Ồng Hồ Sỹ Cát - Lam bồ hìu bơsram pà git, bal mờ broă rơcang ală bơta pal geh nàng drơng bơto bơtê mờ bơsram in, hìu bơsram gam sền gròi uă ngan tus broă lơh rơcang lài, kơryan kòp bơtờp kơnòm bơsram in:

“Bol hi pơgồp bal mờ Hìu sơnơm sàh Ia R’vê, Hìu sơnơm Mpồl Lơh sa - Ling klàng 737 lam lơh ƀồm dà sơnơm, gơ sơt kih dà tàm gùt dar ơdŭ bơsram, hìu ơm bal, hìu sa ngai, hìu bic. Pơlam kơnòm bơsram gàr kloh niam tiah ơm kis tàm cơldŭ ơm sa bic. Mờ kung sồr cơldŭ lơh sơnơm hìu bơsram rơcang wil tơl sơnơm tơmba nàng rơcang lài drơng dilah kơnòm bơsram gơtìp bơta ờ niam”.

Oh Đậu Anh Thư, 10 sơnam, ơm tàm sàh Ia R’vê dơ̆ sơn rờp ơm ngài hìu bơnhă nàng bơsram mờ ơm sa bic tơn tàm hìu ơm bal. Tơnơ̆ 1 poh lơh kwèng mờ tiah ơm pa, oh neh rơhời mờng kwèng mờ rài kis pal kơlôi rơcang is:

“Lài mờ tŭ sa den oh pal ràu tê, sa sin hùc duh. Tŭ nhơl den ờ gŏ di nhơl tàm tiah sùh iò, geh uă sơmac tài sơmac rơp kap bol oh, den tàng he pal pleh. Bol oh kung tam pà tơngai pơs wàs ơdŭ ơm. Tŭ bic den pal kơt kơmùng nàng ờ gơtìp sơmac kap”.

Gùt càr Dăk Lăk tŭ do geh 650 rbô nă kơnòm bơsram gam bơsram tàm 625 hìu bơsram. Ồng Lưu Tiến Quang, Phó Kwang lam bồ Sờh Bơto bơtê mờ Bơsram càr Dăk Lăk pà git, broă rơcang lài, kơryan kòp bơh hìu bơsram geh Sờh git nền là kơnòl broă kuơmàng ngan:

“Gah bơto bơtê mờ bơsram neh sồr ală hìu bơsram, is ồn là tàm tiah sar lơgar ngài lơh ngan pès nhơt rŭ rơm gùt dar anih ơm, ơdŭ bơsram nàng rơcang lài kơryan kòp mprơm gơlik mhàm. Bơdìh hơ̆ tai, gơ wèt mờ ală kòp bơtờp ndai jat kàl, sồr mpồl lơh sơnơm hìu bơsram pal jat sền nền nòn nàng tơrmù lơyah ngan rlau jơh jơnau pơhìn kòp bơtờp gơlik geh, gơbàn uă tàm hìu bơsram”.

Bác sĩ Hoàng Hải Phúc, Kwang lam bồ Anih tờm gròi sền kòp tê jê să càr Dăk Lăk pà git, nam bơsram pa kung là tơngai mìu uă, lơh ală kòp bơtờp bè kòp mprơm gơlik mhàm, jơng tê bơr, kòp rang… gơguh uă. Gah lơh sơnơm pơgồp bal mờ gah bơto bơsram gam lam lơh ală broă lơh rơcang lài kơryan kòp bơtờp:

“Ală ƀòn lơgar lam lơh ală broă lơh dờng gàr kloh niam tiah ơm kis, gàr kloh niam hìu đam nàng kờñ rơcang lài kơryan ală kòp mprơm gơlik mhàm, kòp jơng tê bơr, kòp rang; mờ kung sơlơ cit bơ tơl, cit wơl ală kơnòm dềt ờ hềt geh cit tơl làm. Tàm ală hìu bơsram mờ ală ƀòn lơgar geh jơnau pơhìn uă, bol hi sồr kwang bàng lòt lùp, sền swì sơñio sồ véc-tơ, sơñio sồ kih dà mờ dilah gŏ jơnau pơhìn uă den ai rơndeh oto pơndiang măi ƀồm dà sơnơm gơ sơt sơmac, gơ sơt kih dà tàm uă tiah”.