Pơrjum hòi tơrgùm ală mpồl cau ala măt kâp dờng, cau lam bồ Chính phủ, đơng lam ală anih lơh broă kơlwàng trồ dà lơgar, ală mpồl ală lơgar, ală mpồl lơh sa kă bro, ală cau kơlôi sơnơng bè gah rơndeh par kơlwàng trồ bơh pơgăp 130 lơgar tàm dunia dê; mờ tàm tơrbŏ tơn mờ Anih Kơlwàng trồ ală lơgar ISS. Pơrjum geh uă broă lơh cribơyai gùng dà broă lơh, yal tơngĭt tŭ niam lơh broă bal ală lơgar bè măy mŏk, drơng broă sa priă, kơlôi sơnơng – bơto bơtê bè gah rơndeh par kơlwàng trồ, tàm ală pơlam gùng lơh broă bal ală lơgar chồl pràn lơh sa kơlwàng trồ, gàr niam lơngăp lơngai kơlwàng trồ bơh tìp măt tơm bơh bơr mờ gĭt gơ̆p tam klăc lơh broă bal, chồl pràn jak chài măy mŏk lòt jòi gĭt kơlwàng trồ tài rài tơnơ̆ do kòn bơnus gùt dunia dê.

Đơs sơnđờm Dar cribơyai, ồng Tô Lâm, Tổng Bí thư, Chủ tịch lơgar neh yal 5 jơnau pal jăt ătbồ broă uă gah gơ wèt mờ ù tiah kơlwàng trồ, hòi jà ờ gŏ di pơhìn halà ngui bơta pràn phan tam lơh, ơn kòn bơnus mờ Plai ù tàm anih tờm. Ồng sồr geh jơnau kơlôi lơh jăt hơ̆ Việt Nam bal mờ Tây, Liên hợp quốc, Asean mờ ală cau lơh broă bal kơlôi sơnơng gơs ală mpồl “Ù tiah tài Bơtàu tơngguh mờ Jơnau tơl pràn kong jai”, tơrgùm tàm yal tơnggĭt mờ jòi lơh jơnau yal tơnggĭt ù tiah tài bơtàu tơngguh, tơngguh uă pràn jak gàr niam ù tiah lơngăp lơngai, kơnhăp jŏ mờ tàm tơrbŏ bal kơlôi sơnơng – bơto bơtê – mpồl lơh sa kă bro – bơcri priă nàng bơtàu tơngguh lơh sa kơlwàng trồ. Ală mpồl gơtùi lài jơh tơrgùm tàm ală kơnhoàl ù tiah đah Jum măt tơngai Lik câu Á mờ Việt Nam crăp rơcăng là anih tàm tơrbŏ.