Drim òr (10/09), tàm Hìu lơh broă Chính phủ, ồng Lê Minh Hưng, Thủ tướng Chính phủ đơng lam dơ̆ lơh broă mờ Bộ Priă jền bal mờ ală bộ, gah lơh broă gơrềng bal nàng iăt jơnau pơgồp bal tàm ală gùng dà broă lơh dờng, kwơ màng nàng lơh gơs sră nggal ală jơnau rơcang cih adăt boh lam, tàm hơ̆ geh: Adăt Kes priă dà lơgar (tơrgùm dùl); Adăt tàm pơrlòng giă (tam gơl), Adăt tam gơl bơtơl ờ uă bơta tàm Adăt bơcri priă, Adăt bơtàu tơnguh mpồl lơh sa kă bro dềt mờ di mơ kờp dŭ yal Quốc hội pơgồp jơnau đơs tàm Dar pơrjum dơ̆ 2 tus.

Ồng Lê Minh Hưng, Thủ tướng Chính phủ  pà git, do là ală adăt gơrềng tơn tus mờ broă bơcri priă kă bro, tam pà mờ ngui ală priă, lơh broă bơh mpồl lơh sa kă bro dê, lơh gơs adăt boh lam, tơnguh uă bơta pràn tàm pơrlòng bơh gah lơh sa, mpồl bơtiàn mpồl lơh sa kă bro, den tàng, broă lơh 4 jơnau rơcang cih adăt boh lam pal ai tàm bơta tơrgùm bal jơnau kờñ lơh jăt kơrnoăt di tŭ, lơh tơl ală gùng dà broă lơh dờng bơh Đảng, tàm hơ̆ uă ngan là Jơnau lơh nền tàm Pơrjum dờng dơ̆ XIV bơh Đảng dê, ală jơnau lơh nền tàm pơrjum, jơnau đơs pơn dŭt Dà lơgar dê.