Kờp dŭ geh mờr 100 nă cau ala mat ala ală Bộ, Gah dà lơgar bal mờ ală mpồl lơh sa kă bro tàm càr Dăk Lăk dê. Mờ khà kơphê rlau 560 rơbô tấn, tiêu 84 rơbô tấn, sầu riêng 400 rơbô tấn mờ phan tàm dà mờr 51 rơbô tấn pah nam, càr Dăk Lăk geh phan lơh geh uă ngan, lơh geh jơnau kờñ lơh gơlik phan, tăc bro mờ tăc phan mờ lơgar ndai.

Mơya, broă lơh tăc phan mờ lơgar ndai ală phan bơna phan lơh geh bơh broă lơh sa suơn sre, phan tàm dà tờm bơh càr dê kung gam tơrgùm uă ngan tàm ală drà kă bro bè: Lo, Mỹ, Nhật Bản, Hàn Quốc mờ EU… Tàm tŭ hơ̆, drà ală dà lơgar jat Yàng Islam, geh tiah Ả Rập, Malaysia, Indonesia… geh ờ hềt tus 9% phan bơna tăc mờ lơgar ndai bơh càr Dăk Lăk dê. Dùl tàm ală jơnau gơbàn tờm là bơh mpồl lơh sa kă bro Việt Nam gam ờ tơl jơnau yal bè jơnau kờñ drà kă bro Halal, ală jơnau sồr mờ lơh geh jơnau sồr Halal nàng lơh geh jơnau kờñ tăc phan mờ lơgar ndai dê.