Jat jơnau yal, gơguh tai lơh sa tàm 6 nhai bồ nam bơh càr Dăk Lăk dê kờp dŭ 7,8%, lơyah rlau mờ jơnau dờp dŭ lài rlau 9%. Tàm 12 broă jàu tờm, geh 5 broă jàu lơh geh mờ sơr lèt broă rơndăp lơh, 1 broă jàu sền bal lơh geh, 6 broă jàu ờ hềt lơh geh. Broă hòi jà bơta pràn, ai priă bơcri dà lơgar, ai mat ù mờ broă lơh lơh sa, kă bro bơh mpồl lơh sa kă bro tàm càr Dăk Lăk dê gam gơtìp uă kal ke.

Tàm pơrjum, Mpồl duh broă Làng bol càr Dăk Lăk rơ̆p sền sơwì 30 jơnau yal, 20 sră yal jơnau rcang cih Jơnau lơh nền tàm pơrjum geh gơrềng tus ală gah priă jền - kes priă, bơcri priă dà lơgar, tam gơl sồ, bơto bơtê, lơh sơnơm, sền gàr dà lơgar - lơngăp lơngai, rcang lài pleh mờ trồ tiah lơh aniai mờ mut lơh broă gơnoar atbồ ƀòn lơgar 2 kấp. Tơngume lùp mờ hơ jơnau lùp kung tơrgùm tàm tŭ tơngai mut lơh ală rơndăp broă lơh, ai priă bơcri dà lơgar, bơsong jơnau đơs jơnau dan bơh làng bol dê mờ tă bơsong ală bơta gơ kòl tàm atbồ mờ đơng lam.