Lơh jăt Jơnau lơh nền tàm pơrjum 57, nam do, càr Dăk Lăk digơlan ai rlau 1 rbô tơmàn đong ai jak chài măy mŏk mờ tam gơl pa bơceh lơh in, mơkung digơlan pơn jăt tai gơguh tàm ală nam tus. Bulah bè hơ̆, tus tŭ do, càr rơ̆p pa tam pà geh pơgăp 30 tơmàn đong mờ khà priă jền do kung ờ hềt ngui jơh.

Ồng Cao Đình Huy, Kwang Lam bồ Sờh Priă jền pà gĭt, càr Dăk Lăk ờ siơ̆u bơta pràn ai jak chài, măy mŏk mờ tam gơl pa bơceh lơh in. Mờ ală broă dong kờl gam geh ngui, mpồl lơh sa kă bro dềt mờ di mơ digơlan geh dong kờl tus 100 tơlak đong pah nam. Bàr pe kơnòl broă kơlôi sơnơng jak chài geh kes priă dong kờl bơh 50% tus 100% priă cau lơh broă, phan ngui lơh mờ măy mŏk phan ngui. Bulah bè hơ̆, kờñ pal bơ̆t geh ală rơndăp broă lơh, jơnau dan tơl loh làng nàng lam lơh.

Bè đah mpồl lơh sa kă bro, ồng Phạm Ngọc Duy Liêm đơs là, drà tŭ do ờ siơ̆u phần mềm halà ală gùng dà broă rơndăp lơh măy mŏk. Bulah bè hơ̆, mpồl lơh sa kă bro pal gĭt nền geh he kờñ bơta lơi mờ broă lơh lơi gơtùi bơsong bơh măy mŏk, bơh hơ̆ geh jơnau sồr loh làng gơ wèt mờ mpồl lơh sa kă bro măy mŏk.

“Ală mpồl lơh sa kă bro măy mŏk bol hi gam ờ tơl là jơnau sồr bơh đah mpồl lơh sa kă bro, hơ̆ là bol he pal cribơyai bàr đah, ờ mìng là mpồl lơh sa kă bro măy mŏk tus ràng tơlik măy mŏk mờ là ală mpồl lơh sa kă bro rơ̆p pal geh ală broă sồr pal lơh, ai geh ală kal ke nàng mpồl lơh sa kă bro măy mŏk in lơh”.

Ală cau ala măt sồr, mờ bơta ƀươn bè broă lơh sa sươn sre, lơh gơlik phan lơh geh bơh sươn sre mờ lòt nhơl, Dăk Lăk gơtùi ai lài ală broă rơndăp lơh bè broă lơh sa sươn sre ngăc ngar, jòi gĭt anih tờm lơh, ătbồ lơh sa, lơh gơlik phan mờ lòt nhơl ngăc ngar; bơ̆t bơtàu ù tiah lòt sền gŏ măy mŏk, tiah mpồl lơh sa kă bro ai geh ală broă rơndăp lơh nàng ală mpồl lơh broă măy mŏk tơrlòng lơh gùng dà broă rơndăp lơh tàm pơgăp 3 tus 6 nhai; dilah tơnggŏ geh cồng nha den pơn jăt tai rề ơnàng lơh uă.

Ồng Đỗ Hữu Huy, Chủ tịch Anih duh broă Làng bol càr Dăk Lăk đơs, uă ngan mpồl lơh sa kă bro tàm càr là mpồl lơh sa kă bro dềt mờ dềt ngan. Tàm ală tŭ ngui măy mŏk, pe anih gơkòl dờng là priă bơcri, cau lơh broă mờ nùs nhơm ờ khin tam gơl. Den tàng bè hơ̆, nàng tă bơsong, càr hòi jà mpồl lơh sa kă bro rơcăng lài bơcri tàm măy mŏk geh gơnoar ngui, mơkung sơlơ tàm bơrbŏ bal đah mpồl lơh sa kă bro mờ gơnoar ătbồ, klờng đại họk, anih kơlôi sơnơng mờ ală cau gĭt wă jrô măy mŏk.

“Ală mpồl lơh sa kă bro pal tam gơl bè bồ tơngoh, bè broă lơh tơrlòng lài ătbồ broă, kờñ pal bơ̆t bơtàu niam chài tam gơl pa bơceh lơh tàm dơlam is mpồl lơh broă. Dơ̆ bàr là dan tơrgùm tàm broă lơh geh bơta pràn ƀòn lơgar dê, sền gròi tus broă lơh tơrlòng lài lơh bal “3 hìu”, mpồl lơh sa kă bro dan blơi mờ ală sờh mờ mpồl lơh sa kă bro dan blơi ai ală klờng tàm ù tiah càr dê in, ală anih kơlôi sơnơng mờ ală cau gĭt wă jrô măy mŏk tàm dơlam mờ bơdìh càr, mpồl lơh sa kă bro pal lơh bơta lơi, dan blơi bơta lơi nàng ai anih kơlôi sơnơng, sờh in halà ai ală klờng in rơ̆p geh bơsong geh broă rơndăp lơh hơ̆”.