Mpồl lòt sền neh lơh broă tàm ƀòn Kli A (sơnah ƀòn Buôn Hồ), ƀòn Tuôr (sàh Hòa Phú), ƀòn Tơng Jú (sơnah ƀòn Ea Kao) mờ ƀòn Akŏ Dhông (sơnah ƀòn Buôn Ma Thuột). Bơh lòt sền pà gŏ, tơnơ̆ tŭ geh Dà lơgar dong kờl, uă hìu bơnhă làng bol neh rcang lài is bơta pràn, pờ ơnàng bơcri priă lơh, lơh geh ală phan bơna sền gĭt pơgồp bal mờ niam chài ờs mờng, broă lơh mờ tê mờ lơh broă lơh suơn sre, hời rơ hời lơh geh broă lơh sa ai làng bol ƀòn lơgar in.

Ală tiah kung dan pơn jat tai lơh sir broă lơh dong kờl jat gùng sơlơ tơnguh tai pơlam tàp, dong kờl yal tơngĭt uă, bơt bơtàu phan bơna pơn rơ, tơnguh uă bơta chài lơh lòt nhơl, đơs dà lơgar ndai mờ sơlơ tơnguh tai lơh bal đah ală hìu bơnhă làng bol tus bal lòt nhơl mpồl bơtiàn. Ồng Y Kle Knul, phó lam bồ Cơldŭ lơh broă niam chài sàh Hòa Phú đơs jơnau đơs:

“Pal pơn jat tai sền gròi dong kờl bơta pràn prap gàr hìu jòng ờs mờng, broă tàñ ồi kòn cau, ù tiah niam chài dròng cing jañ mồng, ală dơ̆ lơh chờ ờs mờng mờ bơt bơtàu phan bơna lời kir cèng bơhiàn niam chài ală tiah dê. Sơlơ tơnguh tai broă lơh gơ hòi gơ jà, yal tơngĭ uă, bơt bơtàu dơ̆ tàm tơrbŏ bal ƀòn Tuôr mờ ală tiah lòt nhơl tàm ù tiah càr dê nàng kờñ pờ ơnàng drà năc lòt nhơl mờ tơnguh uă cồng nha ngui ală phan bơna lòt nhơl mpồl bơtiàn”.

Jat mò Đỗ Thị Như Tình, Lam bồ Mpồl Jơi bơtiàn Mpồl duh broă Làng bol càr Dăk Lăk, lòt nhơl mpồl bơtiàn mìng gơtùi bơtàu tơnguh kơnhăp kơ̆ tŭ làng bol ngan ngồn là cau tờm tus bal, dờp lèng bal bơta kwơ bơh broă lơh lòt nhơl dê. Broă ngui di gùng ală bơta kwơ niam chài ờs mờng bơh yau ờ mìng pơgồp bơnah prap gàr phan lời wơl lơm mờ gam lơh geh bơta pràn gơ hòi gơ jà, tơnguh uă bơta kwơ ală tiah tus bơh càr Dăk Lăk dê. Cồng nha lòt sền rơ̆p là bơnàng jă kwơ màng nàng anih lơh broă geh gơnoar in sền sơwì cồng nha broă lơh dong kờl gam geh tŭ do mờ sồr đơs gùng dà broă lơh di pal tàm tơngai pa.

“Mpồl lòt sền kung cih dờp ală jơnau đơs ngan ngồn tàm tŭ lam lơh jat Jơnau lơh nền tàm pơrjum mờ ală broă dong kờl tàm ù tiah càr dê.Jat tàm ală bơta hơ̆ den kung rơ̆p kơlôi sơnơng sồr đơs lam lơh bàr pe Jơnau lơh nền tàm pơrjum pa bè bơtàu tơnguh lòt nhơl mpồl bơtiàn pơgồp bal mờ prap gàr mờ ngui niam bơhiàn niam chài is tàm tơngai pa den rơ̆p cèng wơl cồng nha rlau tai".