Ồng Trần Thanh Mẫn, Chủ tịch Quốc hội mờ mò Nguyễn Thị Thanh Nga, pơ ùr ồng dê tus bal Broă lơh. Broă lơh bơta chài đơs crih tam ya lơh tơnggŏ wơl gùng lòt bơh nhai Hàm Kăc màng nam 1945, bơta tơlik măt bơh Quốc hội khoă I tus 80 nam Quốc hội lòt bal mờ jơi bơtiàn, bơceh mòn bơ̆t bơtàu dà lơgar tàm rài pa. Tàm broă lơh, cau sền geh kis wơl tàm tŭ jiơ khin cha jak chài bơh ală jơnau đơs crih lòt bal mờ nam nhai, bè: Nha bồng bi Đảng, Jơ̆t sin nhai Phàm, Jờng rơ Hồ Chủ tịch, Jơnau Wa nting tơngkah lài mờ tŭ lòt ngài, Tơngklàs tiah đah Jum, Kờñ is…

Tàm bơrlŭ bal đah ală jơnau đơs crih bềng bơta ngoh rơngăc là ală gơl lơma sền gŏ ngan kwơmàng mờ dơ̆ tìp măt lơh kwèng ngoh rơngăc ngan bal mờ ală cau lơh cơng jơnau kah yau. Bơh bơta àng tơngai Ba Đình nhai Hàm kăc màng nam 1945, broă lơh pơyua jơnau kơ̆p kờñ bè bơta tàm pơn jăt tai bơh bơta pin dờn, nùs khin cha mờ kơ̆p kờñ ngan Việt Nam dê, bơtơl tai bơta pràn gơn kơnờm nàng jơh gùt Đảng, gùt làng bol mờ gùt ling klàng tơrgùm bal pràn bơ̆t bơtàu dùl dà lơgar dờng pràn, gam sùm, gơboh gơbài tàm rài bơtàu tơngguh pa.