Drim òr (20/08), ồng Tô Lâm, Tổng Bí thư, Chủ tịch lơgar lơh broă mờ Mpồl Rơndăp broă Dà lơgar bè rơndăp broă tơnjơh ing 5 nam lơh jăt Jơnau lơh nền tàm pơrjum sồ 28 bơh Mpồl Đơng lam Đảng Dà lơgar khoă XIII dê bè broă pơn jăt tai tam gơl pa gùng dà broă đơng lam, at gơnoar broă bơh Đảng dê gơwèt mờ mpồl lơh broă chính trị tàm tơngai pa.

Tơnơ̆ mờ tŭ iăt jơnau yal mờ ală jơnau đơs pơgồp bal, ồng Tô Lâm, Tổng Bí thư, Chủ tịch lơgar sồr Mpồl Rơndăp broă Dà lơgar ring bal jơnau git wă bè anih, jơnau kờñ, jơnau sồr bơh Rơndăp broă dê. Do là kơnòl broă chính trị kwơ màng bè bơ̆t bơtàu Đảng mờ mpồl chính trị; jơnau kờñ ờ mìng là lơh gơs jơnau yal ha là tơlik tai sră nggal, mờ pal đal git di ală bơta gơkòl bơta pràn tàm broă đơng lam, at gơnoar broă, bơh tŭ hơ̆ dan geh gùng dà broă lơh, kơrnoăt lơh broă nàng lơh geh bơta tam gơl tàm tơngai pa. Ồng Tô Lâm, Tổng Bí thư, Chủ tịch lơgar đơs nền, tam gơl pa gùng dà broă đơng lam, at gơnoar broă ờ lơh tam gơl bơta tờm, kơrnoăt pal jăt mờ gùng dà broă đơng lam tờm bơh Đảng dê, mờ nàng lơh geh broă đơng lam di, niam, lơh tờm, nền nòn mờ geh cồng nha rơlao. Mờ pal ring bal bồ tơngoh, jơnau git wă bal mờ broă lơh bè lam lơh, at gơnoar broă; lơh broă mùl màl kơrnoăt “Đảng đơng lam, Dà lơgar atbồ, Làng bol lơh tờm”.