Tàm ală ngai do, ală dơ̆ trồ mìu sùm tus tàm ală broă lơh Hìu bơsram Ơm sa bic tơn bàr kấp tiah nhàr lơgar càr Gia Lai dê. Tàm sàh Ia Chia, broă lơh hờ bơdìh ù tiah uă dơ̆ pal ơm ing. Pah dơ̆ trồ mìu rơhờt, git nđờ rơhiang nă cau lơh neh lơh ngan lik lơh broă nàng bơtơl tơngai lơh.

Ồng Vũ Phúc Tuân, Đơgn lam bồ broă lơh Hìu bơsram tàm sàh Ia Chia, càr Gia Lai pà git: “Mờ khà broă lơh gam tai uă ngan, Tổng Công ty bol añ gam hòi jà mpồl cau lơh broă tus bơh ală càr đah Tô dà lơgar. Nàng tơrgùm mhar, bol añ ai bé rơndeh par nàng ai cau lơh broă tus tàm tiah lơh Hìu bơsram. Tŭ do, broă lơh gơs, bol añ hòi jà geh bơh 40 tus 50 nă cau lơh broă bơh tiah đah Tô dà lơgar tus. Bơdìh hơ̆ tai, bol añ ngui phan lơh broă pa nàng ƀồm, pơgồp bal mờ cau chài nàng lơh mhar broă lơh, lơh tơnguh tŭ lơh bơdìh mờ tŭ geh ai, geh broă dong kờl di pal ai cau lơh broă in”.

Hìu bơsram ơm sa bic tơn bàr kấp sàh tiah nhàr lơgar Ia O kung yal lài bè bơta gơtìp lơyài mờ tơngai geh ai sơl. Ồng Nguyễn Dũng Anh, Đơng lam phó broă lơh pà git, ală khà broă gơtìp lời ing ndrờm pal geh cau chài lơh, kal ke ngan kờñ rơwah cau lơh broă jăt tơngai. Cau tờm lơh mìng gơtùi bơtơl tơngai lơh mờ broă lơh tŭ trồ mang: “Tŭ do, ală broă lơh gam tai pal geh cau chài lơh hơ̆ sồng gơtùi, bè dă găc, lơh gơs. Bol añ gam tơrgùm tàm broă hòi jà tai cau lơh broă nàng lơh tŭ trồ mang, lơh tai bơdìh mờ tơngai geh ai nàng lơh gơs di mờ tơngai geh ai. Tŭ do, jơh ală kwang bàng, cau chài bè cau lơh broă ndrờm lơh ngan lơh gơs, jào broă lơh Hìu bơsram lài mờ ngai sơn đờm nam bơsram pa”.

Tus nggùl nhai 8, khà broă lơh tàm 7 hìu bơsram ơm sa bic tơn bàr kấp Kấp 1 mờ Kấp 2 tàm ală sàh tiah nhàr lơgar càr Gia Lai geh di pơgăp 85%. Ală mpồl jơdŭ bơsram, hìu ơm bal mờ hìu tàp pràn să jan neh lơh gơs bơnah broă tờm, mơya gam ờ uă khà broă bè hìu sa, hìu atbồ hìu bơsram lơh broă, hìu cau pơgru lơh broă kung gam lơyài bơh 5 ngai tus nggùl nhai.

Nàng dong kờl ală cau tờm lơh bơtơl tơngai lơh, mờr 780 nă kwang bàng, cau ling pơn jăt tai tus lơh, bŭ lah neh lơh gơs khà broă lơh geh jào. Đại tá Nguyễn Công Ngân, Phó Chính ủy Sư đoàn 320, Ling mpồl 34, đơng lam mpồl lơh broă dong kờl tàm tiah lơh Hìu bơsram sàh Ia O pà git: “Mìng is Ling mpồl 34, bol añ dong kờl lơh tàm sàh Ia O, neh lơh gơs broă dong kờl lơh jơh rơlao 3000 thơ̆k vuông pơngàr gùt dar hìu bơsram. Sơrlèt mờ broă rơndăp lơh geh ai bơh ngai 18 nhai 7. Tŭ do, mpồl bol añ pơn jăt tai dong kờl cau lơh hìu nàng lơh tàm ală tiah đah dơlam hìu bơsram tai”.

Uă poh do, kwang đơng lam Anih duh broă Làng bol càr Gia Lai sùm lòt sền ală broă lơh tàm hìu bơsram, lơh broă mờ cau tờm bơcri priă mờ cau tờm lơh nàng bơsong ală gơkòl gơlik geh. Ồng Lâm Hải Giang, Phó Chủ tịch Anih duh broă Làng bol càr Gia Lai đơs nền, càr ờ lơh wơl tơngai geh ai nàng lơh gơs rơndăp broă lơh; sồr ală mpồl dờp lơh hòi jà uă ngan cau lơh broă, phan lơh broă, bơyai lơh niam mờ ai lài broă lơh gơs ală khà broă geh kwơ nàng drơng nam bơsram pa in. “Ală mpồl lơh broă, cau tờm lơh pal ai di tŭ tơngai sơn đờm nam bơsram pa tàm 7 hìu bơsram ơm sa bic tơn là jơnau sồr ling klàng, là jơnau sồr bơh plai nùs bơh să tờm ală oh mi dê. Mờ ală broă lơh, he pal sơrlèt mờ kal ke, lơh ngan mờ lơh ngan lơh nàng lơh gơs ală khà broă tờm drơng tàm broă bơsram sră ai ală sao in, nàng mŭt nam bơsram pa, ală sao geh hìu bơsram pa”.

Mìng gam rơlao 1 poh lài mờ ngai sơn đờm mŭt bơsram, tàm ală broă lơh Hìu bơsram bàr kấp ơm sa bic tơn Kấp 1 mờ Kấp 2 tàm ală sàh tiah nhàr lơgar càr Gia Lai dê, ală mpồl lơh broă gam lơh ngan ntoăt pơrlòng mờ tơngai nàng lơh gơs di tŭ wă git nđờ rơbô nă kơnòm bơsram mŭt tàm nam bơsram pa tàm ală hìu bơsram geh lơh dờng niam, ndrờm bal.