Tŭ do, ală anih ràng tăc phan, drà pa, mờ drà tàm ƀòn dờng Buôn Ma Thuột, càr Dăk Lăk, nùs nhơm sa tềp neh hô hơng. Ală cau kă bro mờ drà pa neh bơka niam, ràng tơlik ală bơta phan kờñ pal geh nàng drơng broă làng bol in tàm tơngai sa tềp. Drà pa Co.opmart Buôn Ma Thuột neh ơn prăp mpồl phan bơna drơng broă sa tềp kờp priă rlau 80 tơmàn đong, tàm hơ̆, phan bơna Việt Nam geh tus 90%. Drà pa ngui broă lơh pơn jờng, tơrmù giă gĭt nđờ rơbô bơta phan bơh ngai 1/12/2024 tus 28/1/2025. Mpồl phan bè ờs giă rlau 20% là ală bơta phan, bè: phan ngui sa, ală bơta phan lơh gơlik, poăc phan poan jơng, iar, ada, biăp bùm kơnuh plai đo mờ ală bơta phan ngui sa pơn rơ ngan tàm tơngai sa tềp dê.

Nàng gàr niam bè ờs giă drà kă bro tàm tơngai lồi nam mờ Sa tềp bơhiàn Dà lơgar nam Ất Tỵ 2025, Anih duh broă làng bol càr Dăk Lăk neh ai lơh jat Broă rơndăp lơh ơn prăp phan bơna kwơ màng. Tŭ do, 11 mpồl lơh sa kă bro dờng neh rcang ală bơta phan kờp priă rlau 507 tơmàn đong, lơh geh pơgăp 36,4% jơnau kờñ ngui bơh làng bol dê. Ală bơta phan bè ờs giă, geh phan sa, phan ngui lơh gơlik lài, poăc, tơngi, sơdàng, ƀòk ngòk, biăp bùm kơnuh plai đo mờ ñiên liệu.