Dăk Lăk tŭ do geh pơgăp 44 rbô lồ sầu riêng, tàm hơ̆ rlau 33 rbô lồ gam gơ ai tơnhàu, plai lơh geh kàl nam 2026 kờp dŭ geh pơgăp 500 rbô tấn. Do là dùl tàm ală gah phan lơh geh bơh sươn sre geh priă tăc mờ lơgar ndai uă ngan rlau jơh ƀòn lơgar dê, tă pơgồp kwơmàng tàm gơguh tai lơh sa mờ priă lơh geh bơh làng bol dê.

Bulah bè hơ̆, tềng đăp jơnau sồr ngai sơlơ kal ke ngan bơh ală drà blơi phan dê bè jòi gĭt nền anih tờm lơh, sền swì kòp bơtờp phan tam mờ niam sàng goh phan sa, broă lơh ătbồ màh sồ tiah tam, màh sồ anih ơn klơm tàm bàr pe tiah kung gam ờ hềt dipal sơl, geh sùm jơnau pơhìn gơrềng tus bơngă pin dờn mờ broă lơh tăc mờ lơgar ndai.

Mpồl Lơh kơnòl broă sùm Tỉnh ủy càr Dăk Lăk sồr Đảng ủy Anih duh broă Làng bol càr do sồr ală sờh, gah mờ ƀòn lơgar sơrbăc mhar kờp sền nền wơl jơh ală màh sồ tiah tam, màh sồ anih ơn klơm neh geh pà; lơh mhar broă pà pa gơ wèt mờ ală tiah tơl bơta; kràñ cê kơ̆ nùs lơh bơsong ală broă lơh tăc blơi, ai apah, ai jồm màh sồ tiah tam, màh sồ anih ơn klơm mờ ală broă lơh blơ̆ blăc tàm sră nggal tăc mờ lơgar ndai.

Càr Dăk Lăk kung rơ̆p lơh gùng dà broă lơh pơgồp bal ală gah đah ală anih lơh broă broă lơh sa sươn sre, lơh sa mờ măy mŏk mờ kă bro phan, kwang àng, sền swì phan tăc blơi mờ lơgar ndai, dia mờ gơnoar ătbồ ƀòn lơgar in nàng kờñ ring bal jơnau yal tơnggĭt, sok sền kràñ ală broă lơh gơlik – tơrgùm blơi – tăc mờ lơgar ndai; mơkung lơh pràn tam gơl sồ, bơ̆t bơtàu ală jơnau yal tơnggĭt ngui bal drơng broă lơh ătbồ, yal tơngkah mờ đơng lam lơh jăt.

Jăt ồng Lương Nguyễn Minh Triết, Kwang bàng Đảng Dà lơgar, Bí thư Tỉnh ủy càr Dăk Lăk, uă gơkòl bơh gah sầu riêng dê tŭ do gơrềng tus kơrnoăt boh lam, gùng dà broă lơh gơ wèt gơnăp gơnoar Dà lơgar dê, ngan là broă pà màh sồ tiah tam, màh sồ anih ơn klơm, jòi gĭt anih tờm lơh gơlik mờ ală cơldŭ sền swì lơh tơrlòng. Càr Dăk Lăk neh tơrgùm jơh ală jơnau đơs tă pơgồp nàng dan mờ Dà lơgar gờñ tă bơsong, pleh gơrềng tus tăc blơi mờ tăc mờ lơgar ndai tàm kàl tơnhàu nam do.

“Dan bè lơh sir jơnau pal jăt gơrềng tus jòi gĭt anih tờm lơh gơlik, pà màh sồ tiah tam, màh sồ ơn klơm, mờ hòi jà mpồl bơtiàn lơh bal cơldŭ sền swì lơh tơrlòng.  Tŭ do, Tơrgùm ală mpồl sầu riêng mờ mpồl lơh sa kă bro sầu riêng dê là bơta pràn càr dê den gam ờ suk ngan bè broă do. Den do kung kơldìng tàm gùng dà broă bơh Dà lơgar dê sơl, mờ càr kung gĭt bè hơ̆ sơl mơya càr kung ờ gơtùi lam lơh jăt broă do sơl ờ”.

Mờ ală jơnau sồr lơh kràñ cê jơh nùs bơh Tỉnh ủy dê kung bè bơta mŭt lơh bal ndrờm bal bơh ală kâp, ală gah dê, Dăk Lăk kơ̆p gơn rơ̆p tă bơsong di tŭ ală gơkòl, lơh kràñ ătbồ jơh ală broă lơh gơlik mờ tăc sầu riêng mờ lơgar ndai. Bơh hơ̆, ờ mìng sền gàr măt kă bro sầu riêng Dăk Lăk tàm drà ală lơgar lơm mờ gam pơgồp bơnah gàr sùm gơguh tai kơnhăp jŏ ai gah phan tờm ngan in, gàr priă lơh geh ai cau tam in.