Tơnơ̆ tŭ rơndăp tăp sèng, càr Dăk Lăk geh bă ù geh is rlau 18 rơbô kơi sồ vuông, khà kờp làng bol là 3 tơlak 346 rơbô 853 nă. Ồng Nguyễn Đình Trung, Kwang bàng Đảng Dà lơgar geh pồ lơh Ƀí thư Tỉñ ủy càr Dăk Lăk, ồng Tạ Anh Tuấn geh pồ lơh Củ tịc Anih duh broă Làng bol càr Dăk Lăk.

Jàu Jơnau lơh nền tơnggơs càr pa mờ đơs sồr lơh tàm dơ̆ pơrjum, ồng Lê Hoài Trung, Bí thư Đảng Dà lơgar, Lam bồ Cơldŭ lơh broă Đảng Dà lơgar đơs nền: Mờ bơhiàn tam klăc bal, nùs nhơm khin cha, jơh nùs jơh tồr mờ nùs nhơm tam gơl pa, bơceh lơh, Đảng ƀộ, gơnoar atbồ mờ làng bol ală jơi bơtiàn càr Dăk Lăk bal mờ bơta đơng lam kràñ ngan, bơta dong kờl di tŭ bơh Dà lơgar dê bol he rơ̆p lơh jat niam bơta pràn, lơh jat niam ală cồng nha lơh geh, kơ̆ kơl jăp sơr lèt gan tơl bơta kal ke, bơta lòng. Ngan ngồn là ală bơta ƀuơn bơta pràn bơh càr Dăk Lăk pa dê rơ̆p geh lơh ngan ngồn mờ ală broă bơtàu tơnguh pràn kơl dang lam càr Dăk Lăk brồ guh, gơ gơs tiah gơguh lơh sa ngăc ngar, geh gơnoar broă tề lam tàm tiah Tây Nguyên mờ tiah jat kềng gah dà lềng đah jum tàm gùl Dà lơgar.