Tàm Pơrjum Mpồl Duh broă Đảng ƀộ càr Dăk Lăk dơ̆ 29, Ƀí thư Tỉñ ủy càr Dăk Lăk sồr ală kâp ủy, mpồl đảng, anih lơh broă, mpồl lơh broă lơh jăt rơndăp tăp sèng mpồl lơh broă dơ̆ do gơ in niam ngan broă lơh kwang bàng jăt anih broă lơh, pal săc rwah di cau geh bồ tơnggoh jak, pràn jak lơh broă, bơngă pin dờn, jơh nùs jơh tồr, kơnòl; lơh sir broă rơndăp tăp sèng mpồl cau, tơrmù dipal mpồl lơh broă ală anih lơh broă cíñ trị càr dê lài mờ ngai 20/02/2025.

Gơ wèt mờ anih lơh broă, mpồl lơh broă, tiah ờ hềt lơh jăt broă rơndăp lơh rơndăp tăp sèng dơ̆ do, pơn jăt tai kờp sền nền, kờp dŭ kơlôi sơnơng tơrmù dipal pơgăp 15% anih lơh broă tờm jăt di nùs nhơm sồr lơh bơh Dà lơgar dê. Digơlan tàm poh tus, Dăk Lăk rơ̆p ngan ngồn yal ală jơnau lơh nền bè broă lơh kwang bàng, sơrbac mhar ai mpồl lơh broă pa mŭt lơh broă. Ồng Nguyễn Đình Trung, Ƀí thư Tỉñ ủy càr Dăk Lăk pà gĭt, Tỉñ ủy, Mpồl duh broă Làng bol, Anih duh broă Làng bol rơ̆p yal ală jơnau lơh nền tơnơ̆ tŭ pơrjum Mpồl duh broă Làng bol. Tơnơ̆ hơ̆, cau lam bồ ală anih lơh broă mpồl lơh broă mờ kâp phó pal kŭp tê tơn tàm ală broă lơh: rơndăp tăp sèng anih lơh broă, priă jền, phan bơna, ală ƀăng kị hơ̆ sồng rơ̆p lơh broă ngan ngồn ală anih lơh broă mpồl lơh broă pa bơh ngai 01/03/2025.