Ồng Nguyễn Doãn Anh, Thượng tướng, Phó Chủ tịch Quốc hội bal mờ ală cau ala măt ală bộ, gah Dà lơgar dê tus bal dơ̆ pơrjum tàm Ƀlàng tơ̆p ƀồc cau ling chơ̆t màng càr Dăk Lăk dê. Jăt Mpồl Sồr lơh bè jòi, rờ tơrgùm mờ đal gĭt muh măt ƀồc ntìng cau ling chơ̆t màng càr Dăk Lăk dê, tơnơ̆ mờr 7 nhai lòt gan brê dờng, tiă dà croh jàñ tàm ù tiah càr Mondulkiri, lơgar Bơtau Campuchia dê, kwang bàng, cau ling Mpồl K51 neh jòi, rờ tơrgùm mờ jun rê hờ lơgar tờm 27 ƀồc ntìng cau ling chơ̆t màng rê hờ lơgar.

Do ndrờm là ală ƀồc ntìng cau ling chơ̆t màng ờ hềt đal gĭt geh muh măt. Ồng Đinh Văn Hưng, Đại tá, Chính ủy Mpồl Đơng lam Ling klàng càr Dăk Lăk pà gĭt, cồng nha do là bơta lơh ngan uă ngan bơh kwang bàng, cau ling mpồl phàu crong càr dê, is ồn là Mpồl K51 tàm bơta ù tiah sơbơng roh ngan, jơnau yal tơnggĭt ngai sơlơ êt tĕ.